‘Di nagkatuluyan

Dear Vanezza,

Ako po si Juryn. Noong ako’y bata pa, may kalaro akong lalaki. Mula 7 years old kami ay close na kami. Nang mag-high school kami ay nagkasundo na pagtapos namin mag-aral ay magpapakasal kami. Pero bago kami mag-college ay nagkahiwalay kami. Kinuha siya ng kanyang mga magulang sa Canada at doon na siya nanirahan. Isang taon kaming nagkaroon ng komunikasyon pero pagkatapos ay wala na akong balita sa kanya. Ngayo’y may asawa na ako at buntis sa first baby ko. Pero hanggang ngayon ay naiisip ko pa rin siya. Natatakot ako na baka isang araw ay dumating siya at datnan niyang may pamilya na ako. Hindi ko rin matiyak ang magiging reaksiyon ko dahil alam kong mahal ko pa rin siya. Ano ang gagawin ko?

Dear Juryn,

Sadyang dumarating sa buhay na ang inaasahan nating mangyari ay hindi nangyayari. Nagbago ang kapalaran ninyo kaya harapin mo ang katotohanang hindi na kayo puwede sa isa’t isa. Ihanda mo ang sasabihin mo sa kanya kapag inalok ka niyang makipagbalikan. Kahit mahal mo siya hindi na puwede dahil may pamilya ka na. Mahalin mo ang iyong asawa at anak at ituring mo na lang siyang isang panaginip.