Inabandona ni mister

Dear Vanezza,

Ako si Bea, isang tindera sa palengke at hiwalay sa asawa. Kasal kami at may 2 anak. Tatlong taon na siyang wala sa aming piling mula nang sumama sa ibang babae. Wala na rin akong komunikasyon sa kanya. Ang problema ay may bf ako ngayon. Ayaw ko munang makipag-live-in sa aking bf dahil alam sa aming lugar na may asawa ako. Palihim lang kung kami’y magtagpo. Gusto ko sana na pakasalan siya pero paano? Baka ako makasuhan ng bigamy. Ano ang dapat kong gawin?

Dear Bea,

Sa tingin ko’y pwedeng ma-annul ang inyong kasal dahil may ground at ito’y ang pagtataksil ng iyong asawa. Ang problema ay hindi mo na siya mahagilap. Pero tama ang desisyon mo na huwag makipag-live-in hanggat hindi nagiging legal ang paghihiwalay ninyo. Mabuting kumonsulta ka rin sa abogado para malaman mo ang mga hakbang na puwede mong gawin sa pagpapawalang bisa ng iyong kasal. At kung desidido talaga ang nobyo mo na kayo’y pakasal, pwede ka niyang samahan o tulungan sa pag-aasikaso tutal kaligayahan naman ninyo ang nakataya dito.

Sumasaiyo,

Vanezza