Nahihiyang manligaw

Dear Vanezza,

Last year ko pa gustong sumulat sa iyo. Kaso nahihiya ako. Personal kasi ang problema ko kaya itago mo na lang ako sa pangalang “Kabo”, 34 anyos at binata pa. Ako po ay isang kuba kaya tawag nila sa akin ay “Kabo”. Hindi ko pa naranasang magka-syota dahil sa aking anyo. Kaya kahit may nagugustuhan ako, hindi ako makadiskarte. Hindi naman grabe ang pagka-kuba ko pero talagang tipong hindi iibigin ng babae. Isa akong matadero sa palengke. Umiibig ako sa isang tindera. Ligaw-tingin lang ako. Kapag nahuhuli niya ako, nginingitian naman ako. Isang taon ko na siyang kilala at alam ko wala siyang bf kahit may mga manliligaw siya. Hindi ba dyahe kung ligawan ko siya?

Dear Kabo,

May karapatan kang manligaw dahil binata ka naman. Huwag mong gawing balakid ang iyong pisikal na anyo. May mga taong unano pero ang asawa’y normal. May mga kuba ring tulad mo na may asawa’t anak at maligayang nagsasama. Sa tingin ko’y mayroon kang inferiority complex dahil sa kapansanan mo. Paglabanan mo iyan at makikita mong balang araw ay makakakita ka ng babaeng mamahalin at magmamahal din sa iyo.

Sumasaiyo,

Vanezza