Joross, pinagtripan ang pera ni Alden

Umulan ng tigpa-P500 sa victory part ng Hello, Love, Again at sa napanood na­ming video, nag-enjoy ang lahat na nasa party na makipag-agawan sa P500 na nagliliparan. Pati mga bossing ng Star Cinema, sumali sa pag-aagawan ng P500 at dinig sa video ang malakas na tawanan.

Si Kathryn Bernardo, hindi nakipag-agawan, may P500 na kusang lumipad sa harap niya na alangan namang hindi niya kunin. Tuwang-tuwa ang aktres sa nakuhang datung at mas natuwa siguro ito kung nadag­dagan ang kanyang nakuha.

Sabi ni Joross Gamboa na siyang nagpalipad ng pera, idea ni Alden Richards na mamigay ng cash sa party. Si Joross din ang nagpaagaw sa pera na nakalagay sa plastic bag na nasa tabi niya ay palihim na dumudukot.

Lumapit pa sa camera si Joross para ibalitang galing kay Alden ang sandamak­mak na tigpa-P500. Hindi lang nito binanggit kung magkano ang total ng datung na pinalipad at pinaagaw nito.

Samantala, malapit nang mawala sa mga sinehan ang HLA dahil sa 2024 Metro Manila Film Festival at malapit na ring magtapos ang Pulang Araw. In fact, sa Dec. 27, na ang finale ng historical drama series ng GMA 7.

Habang wala pang next project, sa movie nila ni Heaven Peralejo na Out of Order muna siya mapapanood. Kaya lang, tila sa streaming platform siya ilalagay ng Viva Films at hindi for cinema release.

And of course, inaabangan ng fans ni Alden ang kanyang 33rd birthday sa Jan. 2, 2025.

Boss Toyo, ‘di inisip ang TF sa matigas

Kabilang sa bagong cast ng Season 3 ng Tolome! Walang Matigas na Pulis sa Matinik na Misis, si Boss Toyo, bilang siya. So, may mga eksena ang cast na pupunta sa shop niya para magbenta ng memorabilia at mga gamit at tama si Sen. Bong Revilla, hindi na nito kailangan pang umarte.

Bago nga tanggapin ang show, tsinek niya muna ang kanyang schedule at tinanong ang team ni direk Enzo Williams ng schedule ng taping. Saka, ginawan ng paraan ni Boss Toyo na libre siyang makakapag-taping sa show dahil bukod sa idol   si Bong, kababayan din niya at taga-Cavite rin siya.

Tinanong namin si Boss Toyo ng kanyang talent fee, magkano nga ba ang TF (talent fee) niya?

“Walang usapan sa talent fee,” sagot ni Boss Toyo. Kaya nag-follow-up question si Dondon Sermino kung dahil ba sa mayaman siya kaya hindi isyu ang TF? In fact, ang alam ng mga tao, mayamang-mayaman na siya.

Anyway, sa Dec. 22, 7:15 p.m., na ang premiere ng S3 ng Tolome! Walang Matigas na Pulis sa Matinik na Misis, kaya, maririnig na naman natin si Gloria (Beauty Gonzalez na sumisigaw ng “Tolomeeee!”