Kapuso actress Lianne Valentin, hinahanap ang ama!

Isa sa naging hugot ng Kapuso actress na si Lianne Valentin para sa character niyang si Beatrice sa bagong murder mystery series na Royal Blood ay ang estado ng relasyon niya sa kanyang tunay na ama.

Sa Royal Blood ay may matinding galit ang character ni Lianne sa kanilang ama na gina­gampanan ni Tirso Cruz III. Kaya sa mga eksena raw ni Lianne kasama si Kuya Pip ay malayang nailalabas nito ang kanyang emosyon.

Sa totoong buhay ay matagal na raw walang communication si Lianne sa kanyang biological father. Hindi raw nito alam kung nasaan na ito at kung masaya ba ito sa kanyang showbiz career ngayon.

“Matagal na po yung huli naming pag-uusap. As in, wala po akong balita na sa father ko. But I hope na nasa mabuti siyang kalagayan,” sey ni Lianne.

Pinapasalamatan ni Lianne ang kanyang ina na naging matatag at ginawa raw ang lahat para mabigay ang mga pangangailangan nilang magkakapatid. Kaya sa kanyang ina raw pinagkakatiwala ni Lianne ang kanyang mga kinikita sa showbiz.

“Ever since naman po noong bata pa ako at gumagawa ako ng mga commercials at lumalabas na ako sa mga TV shows, si mommy ang may hawak ng mga kinikita ko. Noong nasa tamang edad na ako at binigay na niya sa akin yung mga naipon kong pera sa pag-aartista, naiyak po ako kasi naging maingat si mommy sa pagtago ng mga kinita ko. Ngayon po, ako na ang tumutulong sa kanya mga gastusin sa bahay at sa pag-aaral ng dalawa kong kapatid,” sey ni Lianne.

Brad and Angelina, hindi pa tapos ang laban

Hindi pa natatapos ang court drama ng former Hollywood couple na sina Brad Pitt at Angelina Jolie para sa Miraval estate nila sa France na nagkakahalaga ng $164 million. Sa tinayong chapel sa Miraval estate kinasal sina Brad at Angelina noong 2014.

Sa bagong court papers na inihain ng kampo ni Pitt, nakalagay na binenta ni Angelina ang kanyang share sa Miraval estate sa isang Russian oligarch pagkatapos na mabigyan si Pitt ng joint custody sa kanilang mga anak.

Ayon pa sa legal counsel ni Pitt, nakipag- “collaborate in secret” si Angelina sa Russian. Napag-alaman din na ito ang same Russian na gustong bilhin ang buong estate noon pero tinanggihan ito ni Brad. Tinawag na “unlawful, severely and intentionally damaging” ang ginawa ni Angelina.

Samantalang itinanggi naman ni Angelina ang akusasyon sa kanya ni Pitt na binenta nito ang kanyang share sa estate na hindi nito nalalaman.

Inabot na ng pitong taon ang court battle ng dalawa simula noong mag-file ng divorce si Angelina noong 2017. Naungkat na ang mga hindi dapat malaman ng publiko sa pagsasama ng dalawa tulad ng pagiging alcoholic ni Brad at ang ginawa nitong pananakit sa isang anak nila.