Heaven, gusto munang maging fur mom

Kinumpirma na ni Heaven Peralejo ang paghihiwalay nila ni Kiko Estrada sa pag-unfollow at pag-delete niya ng photos nila at sa kanyang Instagram account.

Sagot ito ni Heaven sa ginawang pag-delete ni Kiko sa photos nila sa kanyang IG ilang linggo na ang nakaraan.

Noong nakaraang buwan lang ay naging open na sina Kiko at Heaven sa kanilang relasyon at pinagtanggol pa nila ang isa’t isa sa naging bashers nila sa social media, lalo na sa followers ni Devon Seron na bigla raw hiniwalayan ni Kiko para kay Heaven.

Pero pagkaraan ng isang linggo pagkatapos ng kanilang pag-amin, bigla na lang kumalat ang balita na hiwalay ang dalawa dahil sa ginawang pag-delete ni Kiko ng photos ni Heaven sa IG.

Sa huling interview kay Heaven, sinabi nito na parang isang rollercoaster ride raw ang naramdaman niya nitong mga nakaraang buwan. Mas gusto raw niyang i-practice ang self-love.

Mas gusto raw ni Heaven ngayon na i-share ang kanyang love sa kanyang pamilya at pagiging fur mom sa kanyang dalawang pet dogs.

TNT champion, dating talunan sa The Voice

Tinanghal na Grand Winner ng Tawag ng Tanghalan Season 5 ang 19-anyos na si Reiven Umali na taga-Cavite.

Nakaharap niya ang 2nd place na si Adrian Manibale at 3rd-placer na si Anthony Castillo.

Hindi nga raw makapaniwala si Umali na siya ang nanalo sa Tawag Ng Tanghalan.

“Lutang pa rin po talaga. Hindi pa rin ako makapaniwala na ako ‘yung nag-champion. Sobrang fan na fan po ako ng TNT mula pa po nu’ng Season 1, kaya nu’ng ako ‘yung nag-champion, hindi po ako makapaniwala. Sobrang galing po nila sa technical, at sa emotions po rin, kaya sobrang hirap nilang kalaban,” sey ni Umali.

Natalo si Umali sa Tawag ng Tanghalan noong 2018 at hindi inikutan ng mga coach sa The Voice noong 2019, pero hindi siya sumuko sa pangarap niya. “Huwag po silang titigil sa pagkanta, dahil po ako naranasan ko na po na-reject. Actually hindi na po talaga ako sasali dito sa TNT kasi after ng The Voice ko, ‘di po inikutan, parang ayaw ko na po,” diin pa niya.

Nag-debut sa ASAP Natin ‘To stage noong nakaraang Linggo si Umali.

Sa ASAP ay kinanta ni Umali ang Creep ng bandang Radiohead, na isa sa mga kinanta niya sa finals ng TV singing competition.