Christian wala ring maisagot tungkol sa paglipat ni Regine

Balitang-balita na ang pag-alis daw ni Asia’s Songbird Regine Velasquez-Alcasid sa GMA Network kaya sa presscon ng Kapusong Pinoy: Paskuhan at Kantawanan sa Anaheim, natanong si Christian Bautista kung nakausap niya si Regine tungkol sa balitang iyon? Matagal nang magkasama sina Regine at Christian sa kanilang The Clash talent search. 

Si Regine as the The Clash host at panel of judges naman sina Christian, Ai Ai delas Alas at Asia’s Nightingale Lani Misalucha.

Ngayong September ay matatapos na ang The Clash at balitang iyon na raw ang last show ni Regine dahil kahit sa kanyang 5-year cooking show na Sarap Diva, nagpaalam na rin siya at nag-last taping day na. Wala pa namang official statement sina Regine at GMA kaya haka-haka nga lamang ang balita.

“Kung nagkausap man kami ni Regs, hindi ko siya tinanong,” sagot ni Christian. 

“Kung anuman ang maging desisyon niya, wala akong sasabihin, irirespeto ko iyon.  Tiyak namang kung ano ang desisyon niyang gagawin, para rin sa kanya at sa pamilya niya. I wish her the best.”

 Ang #KapusongPinoyAnaheim2018 ay magaganap sa October 7, 2018 sa The Grove of Anaheim in Los Angeles, California, kasama nila ni Julie Anne San Jose si Kapuso Primetime Queen Marian Rivera, Philippine Comedy Concert Queen AiAi delas Alas at ang DonEkla tandem nina Donita Rose at Super Tekla.

Virgo ni Bryan, trailer pa lang pasabog na

Trailer pa lamang ng episode ni Bryan Revilla na Virgo para sa Tres na naghuhudyat sa muling pagbabalik sa movie production ng Imus Productions. Masyado nang pasabog ito at makikita agad si Bryan bilang isang PDEA agent na makapigil-hininga ang mga eksena nakikipaglaban, duguan kung duguan, nanatili siyang lumalaban. Bakit Virgo ang title ng episode ni Bryan?

“Si Virgo ay isang undercover agent na naulila dahil ang tatay niya ay kasama sa isang crime syndicate,” kuwento ni Bryan sa presscon. “Nang maging pulis na rin ako, nakasama ako sa mga nag-iimbestiga sa kaso ng tatay ko kaya naman sunud-sunod ang mga pasabog namin na sana ay magustuhan ninyo.”

Kasama ni Bryan sina Carla Humphries at Joey Marquez, director nila si Richard Somes while ang episode ng brother niyang si Jolo Revilla na 72Hours at ni Luigi Revilla na Amats, ang director nila ay si Dondon Santos.

Sa October 3 na mapapanood ang Tres in cinemas nationwide.