MANILA, Philippines - Isang lalaking nagpakasal sa dalawang babae ang karakter ni Ejay Falcon (Jigger) sa Ipaglaban Mo ngayong Sabado (Setyembre 13) sa paghimay ng hit legal drama anthology sa kaso ng bigamy.
Breadwinner ng kanyang pamilya si Lala (Meg Imperial), ang unang asawa ni Jigger. Limang taon siyang nagtrabaho sa ibang bansa upang magbayad ng utang na loob sa kanyang tiyo at tiya na nag-alaga sa kanilang magkakapatid simula nang pumanaw ang kanilang mga magulang.
Kampante at tiwala si Lala na naiintindihan ng kanyang asawa ang kanyang sitwasyon, ngunit lingid sa kanyang kaalaman na nanabang na pala si Jigger sa relasyon nila dahil bihira silang magkasama kahit pa halos siyam na taon na silang kasal.
Laking gulat na lamang ni Lala nang pag-uwi niya sa Pilipinas ay may kinakasama nang pangalawang asawa si Jigger. May nilabag bang batas si Jigger nang magpasya siyang magpakasal sa isa pang babae? Paano dinesisyunan ng korte ang kasong ito?
Bahagi rin ng episode na pinamagatang Kasal Ka Sa Akin, na idinerehe ni Mikey Del Rosario, sina Jeff Gaitan, Crispin Medina, Debraliz Borres, Karen Reyes, at Alora Sasam.
Huwag palampasin ang Ipaglaban Mo, ang gabay ng mga Pilipino sa kanilang karapatan at obligasyong legal, kasama sina Atty. Jose Sison at Jopet Sison, ngayong Sabado pagkatapos ng It’s Showtime sa ABS-CBN.