Garcia nihangyo sa mga manindahay nga dili magpaburot sa presyo

CEBU, Philippines — Nihangyo si Cebu City Mayor Raymond Alvin Garcia ngadto sa mga tag-iya og hotel, kan-anan ug sa mga manindahay nga dili magpaburot sa ilang presyo ilabina sa panahon sa pagsaulog sa Sinulog.

Nakighinabi na si Garcia sa Hotel, Resort & Restaurant Association of Cebu Inc. ug giawhag niya kini nga dili mopasaka pag-ayo sa presyo ilabi na sa mga pamaliton.

“Kasabot ko ana nga naay mga negosyante nga who wants to make a profit to take advantage of the situation. Pero hangyo lang ko nga you know how to temper their increases, kay total this is really a celebration of a fiesta, for our Señor Santo Niño, and people want to come here not only to enjoy the fiesta but also to pay homage to the Señor Santo Niño”, ni Garcia pa.

Sa laing bahin, mopahimangno usab si Garcia ngadto sa mga drayber sa taxi nga dili magpasulabi og paburot sa ilang presyo ug mosunod lang sa patak sa metro.

Dugang pa ni Garcia nga iyang tahasan ang Cebu City Transportation Office ug Land Transportation Office aron maoy magbantay sa mga masakpan nga magpaburot sa ilang mga presyo sa plitehan sa taxi. (BANAT NEWS)