Dugang mga senior citizens sa Mandaue midawat og ayuda

CEBU, Philippines — Mipadayag sa ilang mainitong pagpasalamat ngadto ni Mandaue City Mayor Glenn Bercede uban sa mga personnel sa City Social Welfare Services Office ang mga senior citizens sa Barangay Tabok ug Tingub sa ilang pag-apod-apod sa P5,000 nga ikaduhang hugna sa ilang pinansyal nga ayuda karong tuiga. Mokabat sa 1,550 ka senior citizens gikan maong mga barangay ang nakadawat og tag 5-mil pesos nga financial assistance.

Samtang si suspended mayor Jonas Cortes maoy usa sa ilang pinasidunggan nga bisita isip pag-respeto sa iyang gisugdan nga programa.

Sa nasayran si Cortes mao ang mipaumento sa financial assistance sa mga senior citizen gikan sa P8,000 ngadto na sa P10,000.

Si Mayor Bercede kusganon nga nagpadayag sa iyang suporta sa mga programa ni Cortes ilabi na ang paghatag og pagpakabana sa panginahanglan sa katiguwangan.

Mitabang sa pagtunol sa financial assistance ang mga City Councilors nga sila si Jimmy Lumapas, Malcolm Sanchez, Oscar Del Castillo ug ABC President Dante Borbajo.

Ang mga senior nga naglisud na sa paglakaw o dunay kakulian sa panglawas ang nakadawat gihapon sa hinabang tungod kay gihatud mismo sa ilang panimay ang ayuda. (BANAT NEWS)