CEBU, Philippines — Ang Miami Heat mipatilaw ni Jimmy Butler og mapait nga kapidihan sa una niining duwa batok sa kaniya niya team human ilang gilampornas ang Golden State Warriors, 112-86, sa NBA kagahapong adlawa didto sa Kaseya Center sa Miami, Florida.
Si Butler, nga gi-trade ngadto sa Golden State niadtong Pebrero human sa pipila ka bulan nilang panagbangi sa Heat management, mitapos lamang og 11 puntos alang sa Warriors kansang opensa mikagar.
Ang Miami nagkupot na karon og 31-41 nga baraha aron pagpabilin sa ika-10 nga puwesto sa Eastern Conference. Dako sila og puruhan nga makasalmot sa play-in tournament.
Samtang ang Warriors natagak sa 41-31 ug ikaunom karon sa West, usa ka duwa lamang ang ilang gintang sa ikapito nga Los Angeles Clippers (40-31).
Sa laing aksiyon, ang Oklahoma City Thunder mirehistro sa ikapito nilang sagunson nga daog human gipakaging sa Sacramento Kings, 121-105.
Ang labing lig-on nga kandidato pagka-MVP ning NBA season nga si Shai Gilgeous-Alexander mipupo og 32 puntos, pito ka rebounds ug lima ka assists aron pangulohan ang Thunder pagkadlit sa ika-60 nilang daog.
Segurado na ang Thunder nga moangkon sa numero unong puwesto sa West ug ang ilang giapas karon mao ang pagsakmit sa labing nindot nga rekord sa liga.
Sa karera alang sa ikaduhang dapit sa West, ang Houston Rockets padayong nag-una human gipasukarap ang Atlanta Hawks, 121-114, ubos sa pagpangu ni Jalen Green nga miharos og 32 puntos.
Sa Eastern Conference, ang Cleveland Cavaliers miinat sa ilang labaw sa kinatas-ang dapit sa standings uban ang 58-14 rekord human gibugha ang Portland Trail Blazers, 122-111.