Thunder nakaipsot sa Clippers, Nuggets miugbok sa Rockets

CEBU, Philippines —  Si Shai Gilgeous-Alexander mi-iskor og 26 puntos aron pangulohan ang lider sa NBA Western Conference nga Oklahoma City Thunder ngadto sa 103-101 nga pagpiog sa Los Angeles Clippers samtang ang Denver Nuggets mipakgang sa siyam ka sagunson nga daog sa Houston Rockets.

Dili nindot ang outside shooting ni Gilgeous-Alexander apan mipasud siya sa tanan niyang 11 ka free throws apil na ang duha sa hilimatyong segundos nga maoy nagsilyo sa kulbahinam nga daog sa Thunder.

Si Kawhi Leonard mihipos og 25 puntos ug 10 ka rebounds samtang si James Harden mitali og 17 puntos alang sa Clippers nga nagkahanap ang tansa nga makasud sa play-in tournament.

Sa laing bahin, ang Nuggets misikit sa Houston sa ikatulong puwesto sa West human ilang gipasukarap ang Rockets, 116-111. Kini bisan pa man og wala ang alas nilang si Nikola Jokic sa ikaupat nga sunod-sunod nga duwa kay nayayay ang tiil.

Ang Nuggets milampaso sa Rockets sa ikatulong kuwarter, 39-22, diin sila miposte og 19 puntos nga labaw.

Si Jamal Murray mipabuto og 39 puntos aron pangulohan ang unom ka Nuggets nga mikadlit og double figures. Si Michael Porter Jr. midugang og 17 puntos samtang si DeAndre Jordan mikolekta og 11 puntos ug 15 ka rebounds.

Ang Fil-Am nga si Jalen Green maoy nangu sa nahagba nga Rockets uban ang 30 puntos samtang si

Alperen Sengun mirehistro og triple-double nga 17 puntos, 14 ka rebounds ug 10 ka assists sa pilderong kawsa.

Sa East, ang Cleveland Cavaliers miputol sa upat ka sagunson nilang malas human gilampornas ang Utah Jazz, 120-91. Sila si Jarrett Allen ug Donovan Mitchell  nagkumboya'g 34 puntos samtang si Evan Mobley mitampo og 11 puntos ug 11 sab ka rebounds alang sa Cavs nga padayong naghari sa liderato sa East bitbit ang 57-14 rekord.

Lima gihapon ka duwa ang ilang labaw sa defending champion Boston Celtics, nga mibugha sa Trail Blazers, 129-116, didto sa Portland. Si Jayson Tatum mirapido og 30 puntos uban ang siyam ka rebounds ug siyam ka assists alang sa ikalimang sunod-sunod nga daog sa Celtics.

Samtang ang Miami Heat mibugto sa 10 ka sagunson nilang pilde human gipayaka ang Charlotte Hornets, 122-105, luyo sa 42 puntos gikan ni Andrew Wiggins.

Ang Heat nagpabilin sa ika-10 nga dapit sa East ug duna pay puruhan nga maka-apil sa play-in.

Didto sa Detroit, si Ronald Holland mikadlit og 26 puntos aron pangulohan ang Pistons pagpakaging sa New Orleans Pelicans, 136-130.

Si Jalen Duren midonasr og 22 puntos ug 12 ka rebounds alang sa Pistons, nga nakasugakod sa gipabuhagay nga 40 puntos ni CJ McCollum sa Pelicans.