Junior Altas binalikan ang Brigadiers
MANILA, Philippines — Bumangon ang University of Perpetual Help System DALTA mula sa isang double-digit deficit para balikan ang Emilio Aguinaldo College, 103-84, sa NCAA Season 100 juniors basketball tournament kahapon sa EAC Gym sa Ermita, Manila.
Kumamada si JD Pagulayan ng 21 points at may tig-17 markers sina 6-foot-7 Lebron Jhames Daep at Jericho Cristino sa ikaapat na sunod na ratsada ng Junior Altas para sa 6-1 record.
Pinamunuan ni EJ Castillo ang Brigadiers sa kanyang 26 points, 7 rebounds, 7 assists at 2 steals habang may 18 at 16 markers sina Adrian Lanceta at Ian Cuajao, ayon sa pagkakasunod.
Mula sa 42-53 halftime deficit ay bumalikwas ang Perpetual ni coach Joph Cleopas sa third period para makadikit sa 60-61.
Kumawala ang Junior Altas sa fourth quarter tampok ang jumper ni Cristino para sa kanilang 20-point lead, 89-69 kung saan hindi na nakabangon ang EAC.
Samantala, nagpasabog si Daniel Padilla ng career-best 39 points sa 88-84 paggupo ng nagdedepensang Letran Squires sa San Sebastian Staglets.
- Latest
