Cebuana Olympian Joy Tabal Modagan sa EVA Air Marathon
CEBU, Philippines — Ang Sugbuanang Olympian nga si Mary Joy Tabal nanghinaut nga daghang Pinoy runners ang moduyog kaniya sa EVA Air Marathon 2025 nga gikatakda karong Oktubre 26 didto sa Taipei, Taiwan.
Kay sertipikado sa World Athletics, usa kini oportunidad alang sa mga managanay nga mahimamat ug mahugoy-hugoy ang bangiitang mga marathoners sa tibuok kalibutan gawas nga sukdon ang ilang kapasidad nga makalahutay sa usa ka makutas nga lumba.
“To my fellow runners, if you have been competing in local and national races, now is the perfect time to step up and experience a gold label international marathon. Let’s take this opportunity to take this challenge, altogether,” matud pa ni Tabal atol sa pormal nga paglusad sa maong kalihukan nga gipaluyohan sa The Freeman ug The Philippine Star didto sa Robinson Galleria Cebu ning bag-ohay pa lamang.
Si Tabal, nga nagkupot sa rekord isip labing una ug bugtong Pinay nga Olympic marathoner, wala magduha-duha pagdawat sa mahinungdanong papel nga gitanyag kaniya ni Sunshine Lim sa TravelCare isip ambassdress sa Eva Air Marathon gumikan kay aduna pa gihapon siyay tigngog nga padayong nakapadasig sa daghang mga atleta ilabi na sa mga sumusulbong pa.
Gawas sa tahas nga gisang-on kaniya, si Tabal nakahukom nga moapil na lang sab siya og dagan uban ang tinguha nga mapakita siya og mas nindot nga performance sa iyang pagbalik sa internasyonal nga eksena sukad siya misalmot sa Tokyo Marathon niadtong 2023.
Bisan sa kahugot sa iyang iskedyul isip direktor sa Mandaue City sports, si Tabal nagkanayon nga duna pa siyay igong panahon aron makapangandam gumikan kay ang lumba pipila pa man ka bulan gikan karon.
“With a renewed inspiration and excitement, I am ready to hit the road again! And I would like to express my deepest gratitude to Miss Shine (Lim), to EVA Air and TravelCare as I look forward to representing Team Cebu and the rest of the Philippines in this incredible journey,” padayon pa ni Tabal.
Ang Eva Air Marathon naglangkob sab og 3K, 10K ug 21K nga distansiya.
Sa mga mosalmot sa marathon, ang EVA Air mohatag og round-trip airfare promo sa kantidad lamang nga USD275 hangtud sa Marso 30 apil na niini ang libreng rehistrasyon sa mga 3K runners o NTD500 cashback sa ubang mga distansiya.
Dugang niini, ang TravelCare nagtanyag sab og espesyal nga rates alang sa akomodasyon ug airport transfer aron mahimong kombenyente ang tanan alang sa mga partisipante.
Kadtong mga interesado mahimong magparehistro online pinaagi sa https://forms.gle/cKhB8LXze74FgJM36.
Alang sa dugang detalye, bisitaha ang buhatan sa TravelCare diha sa Robinsons Galleria Basement 1, tawag sa 09175148777 o padala og e-mail sa travelcareeight@gmail.com.
- Latest
