Man of a million drills

Coach Jeff Codera mopahigayon og overnight skills training

Ang inilang Sugbuanong basketball coach ug professional skills trainer nga si Jefferson "Jeff" Codera mopasiugda og overnight skills training gikan sa Abril 28 ngadto sa Mayo 2 didto sa Therrish Beach Resort sa Barangay Mavilla, lungsod sa Tabuelan amihanang bahin sa Sugbo.

Gibansagan og "Man of a million drills" sa iyang kadetalyado ug kinaadman sa one-on-one training, si Codera nagbitbit og impresibong kredensiyal nga naglangkob sa iyang pagka-miyembro sa Golden State Warriors training camp sud sa usa na ka dekada. Usa sab siya ka lisensiyadong Gold coach sa USA Basketball.

Sa milabayng mga katuigan, kanunay siyang nagbaid sa abilidad sa mga batan-ong basketbolista nga iyang gitabangan pagkab-ot sa tibuok nilang potensiyal.

Ang 43-anyos nga si Codera modalit og nagkadaiyang mga program alang sa mga partisipante sa lima ka adlaw niyang camp nga gituyo aron pag-ugmad sa ilang dinuwaan sa tanang aspeto.

Apil niini ang mga pamaagi sa ensaktong pag-itsa, pagpasa, pag-dribol ug footwork, unsaon pagkontrola sa bola, counter-attacking ug pagbalanse sa lihok aron makalikay sa injury.

Dugang niini, si Codera motudlo kabahin sa aqua ug sand strengthening skills training ingon man sa heavy training ball ngadto sa mga estudyante.

"I have crafted an individualized training plans for the specific needs and goals of each player," matud pa ni Codera. "This is a perfect opportunity for them to develop their skills and improve their overall basketball knowledge and athleticism."

Kadtong mga interesado mosalmot mahimong mokontak ni coach Jeff (09279315096) o sa Therrish Beach Resort (09498963817).