Creamline tatapusin ang Cherry Tiggo
MANILA, Philippines — Ang semifinals ticket ang kukunin ng nagdedepensang Creamline sa pagharap sa Chery Tiggo sa Game Two ng kanilang quarterfinals series sa 2024-25 Premier Volleyball League (PVL) All-Filipino Conference.
Magtutuos ang Cool Smashers at Crossovers ngayong alas-6:30 ng gabi matapos ang duwelo ng ZUS Coffee Thunderbelles at Petro Gazz Angels sa alas-4 ng hapon sa Ynares Center sa Antipolo City.
Humataw si team captain Alyssa Valdez ng 16 points, 13 excellent digs at siyam na excellent receptions sa 25-10, 27-25, 25-21 pagwalis ng Creamline sa Chery Tiggo sa Game One.
Naitala rin ni Sherwin Meneses ang kanyang ika-100 panalo bilang coach sapul nang hawakan ang Cool Smashers noong 2022 Open Conference.
Inaasahan ni Meneses na reresbak ang Crossovers para makapuwersa ng deciding Game Three.
“Siyempre quarterfinals ito eh, wala talagang magpapatalo ng pa-ganun-ganun na lang. Ine-expect naman namin talaga na lalaban talaga ‘yung Chery Tiggo. So ready lang kami doon sa situation,” ani Meneses sa kahandaan ng Creamline.
Bukod kay Valdez ay muli ring sasandal ang Cool Smashers kina Michele Gumabao, Tots Carlos, Jema Galanza, Bernadeth Pons, Bea De Leon at Kyle Negrito kontra kina Shaya Adorador, Cess Robles, Ara Galang, Pauline Gaston, Seth Rodriguez at Alina Bicar ng Crossovers.
Sa unang laro, puntirya rin ng ZUS Coffee ang semifinals spot sa pagharap sa Petro Gazz na tinalo nila sa Game One, 25-21, 25-23, 27-25.
Sina veteran Jovelyn Gonzaga, Chai Troncoso, Thea Gagate, Mich Gamit, Chinnie Arroyo at Cloanne Mondoñedo ang babandera sa Thunderbelles katapat sina Fil-Am Brooke Van Sickle, Myla Pablo, Aiza Pontillas, MJ Phillips, Djanel Cheng at Remy Palma ng Gazz Angels.
Sumampa na sa semis ang Choco Mucho at Akari mula sa pagwalis sa PLDT at Galeries Tower, ayon sa pagkakasunod.
- Latest
