Doncic nangu sa Lakers paglampaso sa Nuggets

CEBU, Philippines — Si Luka Doncic mipuntos og 30 sa ika-200 nga higayon sa iyang karera sa dihang ang Los Angeles Lakers mipahimus sa napiangan nga lineup sa Denver Nuggets aron pakagingon ang karibal nila sa Western Conference, 120-108, sa NBA kagahapong adlawa didto sa Crypto.com Arena sa LA, California.

Ang Slovenian All-Star guard mao na sab ang nangu sa opensiba sa Lakers samtang wala ang injured nilang alas nga si LeBron James human miharos og 31 puntos uban ang siyam ka rebounds ug pito ka assists sa dominante nilang kadaogan.

Gikan sa pagsugod, kulatado na ang Nuggets nga mitikang sa korte nga wala ang duha nila ka mga bitoon nga sila si Nikola Jokic ug Jamal Murray.

Natiwasan pa ang Nuggets sa sayong pagmangtas ni Doncic, nga mibubo og 21 puntos sa unang kuwater aron ituboy ang Lakers ngadto sa 17 puntos nga labaw, 46-29.

Wala na paginhawaa pa sa Lakers sukad niadto ang Nuggets.

"Like I always say, every day gets better," matud pa ni Doncic. "That's three wins in a row now so we've got to just keep it going."

"We go game-by-game because if you think too far in the future maybe you forget about the next game. We know the (standings) are tight but we've just got to try and win every game," dugang pa sa bag-ong nawong sa Lakers.

Si Austin Reaves midugang og 22 puntos alang sa Lakers, nga gilabyan na sab ang Nuggets sa ikatulong puwesto sa West standings uban ang 43-25 rekord. Ang Nuggets nabalik sa ikaupat bitbit ang 44-26 nga baraha.

Si Doncic, nga mitapon sa Lakers niadtong Pebrero luyo sa labing makapakurat nga trade sa kasaysayan sa NBA, nakatali na og 30 puntos o sobra pa sud wa walo sa 16 ka duwa niya sa LA.