TNT naglaraw og 3-1 nga bentaha, Ginebra buot tablahon ang serye

CEBU, Philippines — Ang TNT Tropang Giga nagtinguha nga moposte og 3-1 nga bentaha sa dihang ilang sangkaon ang Barangay Ginebra Kings sa Game 4 sa best-of-seven PBA Season 49 Commissioner's Cup Finals karong adlawa (Biyernes, Marso 21) didto sa Ynares Center sa Antipolo City.

Si Rey Nambatac mipakita sa labing nindot niyang duwa isip pro samtang si Rondae Hollis-Jefferson hapit morehistro og triple-double sa dihang ang Tropang Giga nakaipsot batok sa Gin Kings, 87-55, sa kulbahinam nga Game 3 niadtong Miyerkules sa gabii didto sa PhilSports Arena sa Pasig City aron paglansang og 2-1 nga labaw sa serye.

Nanginit og maayo si Nambatac nga mipasud og lima sa pito niya ka 3-pointers dayon na ngadto sa paghipos og 24 puntos nga iyang gipalamanan og lima ka rebounds ug pito ka assists.

Wala sab magpabitin si RHJ nga miharos og 20 puntos, 11 ka rebounds ug walo ka assists alang sa Tropang Giga nga mitikang ngadto sa duha na lang ka daog aron sakmiton ang gihandum nilang korona.

Bisa'g miduwa nga wala ang import nilang si Justin Brownlee kay na-injured ang tuong kumagko sa oras nga 6:42 sa ikatulong kuwarter, ang Kings madasigon gihapon kaayo nga mikumbati apan ang Tropang Giga nakamaneho pag-eskapo luyo sa krusyal nga mga shots nilang Nambatac ug Glenn Khobuntin.

Sa dihang nakatabla ang Ginebra, 82-82, si Nambatac mikumpleto sa iyang three-point play ug dayon si Khobuntin mipasud sa iyang breakaway layup nga nakapaginhawa og lawom sa TNT uban ang 87-82 nga bentaha sa pinal nga 14.4 segundos.

"I told the players we're going to see the best of Ginebra even without Justin. We have to be at our best. I reminded them how strong and deep that team is. And when they went up by three, we didn't panic and that's the turning point," matud pa ni TNT coach Chot Reyes sigun sa taho sa PBA.ph. Si Brownlee gidala sa ospital bisan og wala pa mahuman ang duwa ug lagmit dili makapakita'g aksiyon sa Game 4 nga gikatakda karong alas 7:30 sa gabii.

Usa kini ka dakong hagit alang sa Kings nga buot makatabla ug putlon ang serye ngadto na lang sa best-of-three.