Mga atleta sa Run Not Rum mihimo'g kasikas sa lokal ug internasyonal nga karera
CEBU, Philippines — Usa ka pundok sa mga atleta gikan sa Run Not Rum (RNR) Running Club ubos sa paggiya ni coach Jefrey Cola Codino ang mapasigarbuhon sa ilang mga nakab-ot sa nagkadaiyang karera nga ilang gisalmotan sa ilang tugkaran ingon man sa langyawng lapyhan sa miaging semana.
Una sa tanan, si Mark Philip Geniston milutaw sa panganod sa himaya human sila milampos sa labing una niyang international Ironman 70.3 race didto sa Taupo, New Zealand uban ang personal rekord. Ang CEO sa Kevlo Skin Clinic mikumpleto sa makutas nga lumba nga naglangkob og 1.9K swim, 90.1K bike ug 21.1K run sud sa unom ka oras ug 31 minutos. Nakiskisan niya og 20 minutos ang 6:51 niyang marka sa una niyang Ironman didto sa Lapu-Lapu City sa miaging tuig.
Nakapadasig kini ni Geniston nga mohimo'g impresyon sa umaabot pa niyang mga aktibidades karong tuiga nga naglangkob sa 5150 Bohol, Ironman 70.3 Lapu-Lapu, Chicago Marathon ug Sydney Marathon.
Sa laing kontinente didto sa Japan, sila si Julius Jerald Borja ug Frederick Castañeda gibati og tumang kalipay sa dihang nakahuman sila sa Tokyo Marathon 2025.
Dinhi sa ilang nataran, ang Davaoeña nga sakop sa grupo nga si Aeda Mae Siao-Sanchez milangkat og tropero isip first runner-up sa Kalilangan Marathon 2025.
Samtang sa TWM 32.0 Camotes Triathlon, si Mayu Owada Kohno milugwa nga kampiyon sa iyang age group ug 2nd overall sa female division.
Ang mga kauban ni Kohno nga sila si Atty. Brando Ray Raya, Atty. Jupert John Remollo, Miguel Ortiz, Renan Arias, Clement Po ug si coach Jefrey mismo naghudaya sab tungod kay nakahuman sila sa malisud nga tahas nga nanginahanglan og dili laman pisikal nga kusog apan hasta sab lahutay ug mental nga kapasidad.
"Congratulations to all the incredible Run Not Rum athletes who completed both local and international triathlon and marathon races!," matud pa ni Atty. Brando Raya, nga usa sa mga haligi sa RNR team.
"Your dedication, strength, and perseverance have taken you to new heights. You are a true inspiration, showing what it means to push limits and never stop chasing greatness. Keep running, keep thriving!".
- Latest
