Cebu mobalik sa MPBL, Slaughter maoy mangu

CEBU, Philippines — Uban ang tumang kahinam, ang Sugbuanong big man nga si Greg Slaughter naglantaw sa unahan nga pangulohan ang koponan sa yuta niyang natawhan - ang Cebu Classic -  sa giatngan niining pagbalik sa 2025 Maharlika Pilipinas Basketball League (MPBL) season nga gikatakdang mosikad karong Marso 8 didto sa Capital Arena sa Ilagan, Isabela.

Si team owner Voltaire Morales Ora, nga maoy nakapalit sa prangkisa sa International Pharmaceuticals, Inc. (IPI), mikompirmar sa Banat News nga ang Cebu mobalik human sa lima ka tuig nga pahuway sa rehiyonal nga liga nga gitukod ni boxing legend Manny Pacquiao niadtong 2017.

Ang Casino Ethyl Alcohol sa IPI maoy katapusang koponan sa Sugbo nga mipakita'g aksiyon sa MPBL niadtong 2019-2020 nga nabalda tungod sa kalibutanhong pandemiya.

"Yes, there will be a Cebu team in the upcoming MPBL season," matud pa ni Ora atol sa ilang open tryouts alang niadtong mga nangindahay nga maapil sa team niadtong Sabado, Pebrero 15, didto sa Capitol Parish Gym sa may dalan Escario, dakbayan sa Sugbo. 

Naglangkob sa mga mitunga mao ang kanhi mga bitoon sa ilang panahon sa kolehiyo nga sila si Shaq Imperial, Jiesel Tarrosa, Dolan Adlawan, Jayford Rodriguez ug Froiland Maglasang.

"When I learned that the Cebu franchise is available, I grabbed the opportunity right away. I come from this place and I'm very happy that I was able to get it," dugang pa ni Ora, kansang pamilya lumad gikan sa siyudad sa Danao.

Sama ni Ora, ang 36-anyos nga si Slaughter nadasig sab nga mokumbati og balik alang sa Sugbo ilabi na kay siya maoy mangu sa kampanya niini kauban ang pareho niyang kanhi PBA players nga sila si Paolo Hubalde ug Rashawn McCarthy, Darrell Manliguez ug Dennis Santos.

Si Ora nagakanayon nga nakig-estorya sila ni Rhenz Abando apan wala pa kini plano nga moduwa sa MPBL sa pagka karon. Gusto sab unta nila nga kuhaon si Mac Tallo ang ang sikat nga Sugbuanong pointguard anaa na karon sa Pangasinan Abono Reapers.

Ang kumpletong lineup sa Cebu Classic ingon man ang ilang head coach ipahibawo atol sa pormal nga paglusad sa team pipila ka adlaw gikan karon.

"I'm so excited. Everything for me started here in Cebu. This is my home," padayag pa ni Slaughter, nga nakadaog og duha ka sagunson nga MVP awards ug tulo ka sunod-sunod nga kampiyonato uban sa University of the Visayas (UV) Green Lancers taliwala sa mainit nilang panagkaribal ni June Mar Fajardo sa University of Cebu (UC) Webmasters sa Cebu Schools Athletic Foundation, Inc. (CESAFI) dul-an sa duha ka dekada na ang milabay.

"This is where I'd like to be now and I am really happy for this opportunity," dugang pa sa kanhi sentro sa Ginebra center nga mikumbati uban sa Manila Batang Sampaloc sa miaging MPBL season. "We wanted to make the Cebuanos proud. We want to give a good representation of what the Cebuanos could bring."