Hapon nga boksidor mikuha'g atensiyon sa eksplosibong "Binukbukay sa Sugbo"

CEBU, Philippines — Nagmabulokon ang unang edisyon sa "Binukbukay sa Sugbo" sa eksplosibo kaayo ug napuno sa aksiyon.

Salamat sa huego todo nga kumbati nilang Ryoto Owan sa Japan ug ni Jong Seon Kang sa South Korea nga nakalingaw og maayo sa mga fans.

Sa dihang mihupay na ang mainit nga engkwentro, si Owan maoy nasentro sa atensiyon sa dihang iyang gilangkatan og korona si Kang pinaagi sa 9th round TKO aron mamahimong World Boxing Organization (WBO) Global featherweight champion sa main event sa  malampusong promosyon sa OX KBDF Gaming ni Dr. Winley Dela Fuente niadtong Sabado sa gabii didto sa Nustar Resort and Casino Convention Center.

Ang duha ka dekalibre ug maisog nga mga boksidor nagbinayloay og tumba sa brutal ug dugoon nilang kumbati nga nakapahimuot og maayo sa mga manan-away sa way lalis nga "Fight of the Year" contender.

Si Owan milandig og solidong mga kumo ngadto sa nawong nga nakadugo sa ilong ni Kang sa ikaduhang hugna.

Apan si Kang mibawos pinaagi sa pagkonekta og right straight nga nakapalukapa sa Hapon sa ikaupat nga hugna. Nagpadayon ang kulbahinam nilang bugno hangtud nga si Owan milabay og left hook nga nakapahagba ni Kang sa ikapitong hugna. Dali sab hinoon nga nakabawos si Kang pinaagi sa pagpasukarap in Owan sa naghinapos nga bahin sa susamang hugna.

Sa katapusang eksena sa ilang pinaksitay, si Owan mipatupa og serye sa makusog nga mga suntok ngadto sa ulo ni Kang nga wala na makatusik og balik hinungdan nga giundang sa reperi ang away sa nahibilin nga usa ka segundo sa ikasiyam nga hugna.

Dalaygon kaayo ang gihimo nilang pagsinukliay og kumo ibabaw sa ring nga gipakpakan kini og maayo sa mga tawo nga nalipay sa nasaksihan nilang way puas nga binukbokay.     Si Owan nagbitbit na karon og 14-2 rekord uban ang 9KOs, samtang si Kang nadakin-as sa 20-2-2 uban ang 11KOs.

Sa laing aksiyon sa tripleng WBO nga kampiyonato, ang Tsinoy nga si Aketelieti Yelejian (10-4-1, 3KOs) mi-TKO ni Genesis Servania (35-5, 16KOs) sa oras nga 2:55 sa ika-10 nga hugna aron sakmiton ang WBO Oriental welterweight title.