Davis buot mohatag og paglaum sa Mavs

CEBU, Philippines — Si Anthony Davis namahayag nga buot niyang hatagan og paglaom ang mga fans sa Dallas Mavericks nga dismayado kaayo  sa desisyon sa team pag-trade niini sa bitoon nilang si Luka Doncic ngadto sa Los Angeles Lakers hulip kaniya.

Grabi ang kasuko sa mga dumadapig sa Mavs sa kontrobersiyal nga lakang sa Dallas management nga nakatay-og sa liga diin  ang uban mipahigayon pa gani og protesta gawas sa American Airlines Center.

Nakasabot ra hinoon si Davis sa ilang gibati ilabi na kay iyang nakita kon unsa kabililhon si Doncic didto sa Dallas.

"I understand it," matud pa ni Davis atol sa pormal nga pagpaila-ila kaniya isip labing bag-ong miyembro sa Mavs kagahapong adlawa.

"I'm never going to downplay that -- just how I know what I meant to the city of LA. So I'm not surprised by the fans' reaction and the city's reaction. But it's my job to come in and play basketball and do what I'm supposed to do and give the fans hope and reassurance on why (general manger) Nico (Harrison) brought me here."

Si Davis gikatakda nga moduwa sa unang higayon uban sa Mavs  sa ilang home game batok sa Houston Rockets karong adlawa.

Miangkon si Davis nga dili niya makontrol kon unsa man gani ang reaksiyon sa mga tawo apan mipasalig siya nga iyang buhaton ang tanan aron makatabang sa team.

"I don't know how it’s going to be as far as the reaction, but I can't control that," matud Davis. "What I can control, it's going and just winning basketball games and helping the team do whatever I can."

Ning puntoha sa iyang karera, si Davis moduwa sa dili pamilyar nga teritoryo. 

Sukwahi kini sa masadya nga pagsugat kaniya sa dihang ang New Orleans Pelicans mibira kaniya nga No.1 overall pick niadtong 2012 NBA Draft.

Gidawat sab siya uban ang susamang kahinangop sa dihang gi-trade siya sa Pelicans ngadto sa Los Angeles Lakers niadtong Hulyo 2019 ug nakig-alyansa ni LeBron James aron makadaog og NBA title niadtong 2020.

Sa pagkuha nila ni Davis, ang general manager sa Mavs nga si Nico Harrison mipadayag nga ang pagkamaayo modepensa sa dekalibreng big man gihatagan nila og tumang gibug-aton.

Ang five-time All-Defensive selection nga si Davis mi-average og 25.7 puntos, 11.9 rebounds ug 2.1 blocks matag duwa ning season.

"To have Nico trade for me just shows his belief in me and what I can do on the floor," dason pa ni Davis. "It's my job to produce every night and have Mavs nation believe that as well. I'm excited for the challenge."