Makapakurat nga NBA trade Mavs mopadala ni Doncic sa Lakers puli ni Davis
CEBU, Philippines — Ang Dallas Mavericks mopadala sa star guard nilang si Luka Doncic ngadto sa Los Angeles Lakers alang sa big man nga si Anthony Davis sa makapakurat nga NBA trade nga naglangkob og tulo ka teams kagahapong adlawa.
Sigun sa taho sa ESPN, ang five-time All-Star nga si Doncic nga migiya sa Mavs ngadto sa NBA Finals sa miaging season makig-alyansa sa 40-anyos nga si LeBron James didto sa LA.
Ang pag-abot ni Doncic naghatag sa Lakers og posibleng mohulip sa trono ni James. Samtang si Mavericks general manager Nico Harrison nalipay nga nabira nila si Davis gumikan kay makapalig-on kini sa depensa nga gikinahanglan kaayo sa ilang team.
"I believe that defense wins championships," Harrison told ESPN regarding motivation for the trade," matud pa ni Harrison. "I believe that getting an All-Defensive center and an All-NBA player with a defensive mindset gives us a better chance. We're built to win now and in the future."
Gawas ni Davis, makuha sab sa Mavericks ang guard nga si Max Christie ug usa ka 2029 first-round draft pick, samtang madawat sab sa Lakers sila si Maxi Kleber ug Markieff Morris.
Ang Utah Jazz, ang ikatulong team nga naapil sa pagbinayloay og player, molabni ni Lakers guard Jalen Hood-Schifino.
Miulbo ang taho sa makapakugang nga trade human ang Lakers mibugha sa Knicks, 128-112, didto sa New York. Wala gihapon makaduwa si Davis kay nayayay ang tiyan.
Sa iyang bahin, si Doncic wala na mapakita'g aksiyon sukad na-angol ang iyang bagtak niadtong Pasko.
Ang 25-anyos nga Slovenian mi-average og 28.1 puntos, 8.3 rebounds ug 7.8 assists matag duwa alang sa Mavericks.
Sa iyang bahin, ang 31-anyos nga si Davis nakatinir og unom ka seasons sa Lakers. Siyam ka higayon na nahimong All-Star, nakasakmit siya og korona uban sa Lakers niadtong 2000.
Mi-average siya og 25.7 puntos, 11.9 rebounds ug 3.4 assists matag duwa ning season.
- Latest
