James misidlak didto sa New York

CEBU, Philippines — Si LeBron James mikuha'g atensiyon didto sa Madison Square Garden diin siya mipaulbo og 33 puntos sa iyang triple-double sa dihang gipakgang sa Los Angeles Lakers ang lima ka sagunson nga daog sa New York Knicks, 128-112.

Gawas sa eksplosibo niyang opensiba, si James milangkat sab og 11 ka rebounds ug 12 ka assists, samtang si Austin Reaves midugang og 27 puntos alang sa Lakers, kansang solidong depensa nakapahilom sa duha ka mga bitoon sa Knicks nga sila si Karl-Anthony Towns ug Jalen Brunson.

Si Josh Hart miharos og 26 puntos, 13 ka rebounds ug 11 ka assists apan si Towns nalimitahan ngadto sa 11 puntos samtang si Brunson nakamugna lamang og 17 puntos.

Ang Lakers nagkupot na karon og 28-19 nga baraha ug nagpabiling ikalima sa Western Conference. Usa lamang ka duwa ang ilang gintang sa Denver Nuggets.

Gigatongan sa ika-22 nga triple-double ni reigning MVP Nikola Jokic ning season, ang Nuggets nakasugakod sa mainit nga endgame rally sa Chalotte aron pakagingon ang Hornets, 107-104.

Ang Serbian nga sentro mikolekta og 28 puntos, 13 ka rebounds ug 17 ka assists.

Si Miles Bridges mikadlit og 12 sa iyang 24 puntos sa katapusang kuwarter apan nakawang ang impresibo niyang salida kay ang Hornets misukarap sa ikaupat nilang sunod-sunod nga pilde.

Sa laing aksiyon, si Aaron Wiggins mipabuhagay og career-high 41 puntos uban ang 14 ka rebounds aron pangulohan ang Oklahoma City Thunder ngadto sa 144-110 nga paglampaso sa Sacramento Kings.

Midugang si Shai Gilgeous-Alexander og 29 puntos alang sa Thunder nga namawi dayon sa miagi nilang kaparotan sa mga kamot sa Golden State Warriors.

Didto sa San Antonio, si Bam Adebayo mipasud sa iyang jump shot dayon kapupos sa oras aron aswaton ang Miami Heat ngadto sa 105-103 nga kadaogan batok sa Spurs.

Si Adebayo mitapos uban ang 30 puntos, 12 ka rebounds ug siyam ka assists alang sa Heat.

Sa ubang mga resulta, ang Washington Wizards miputol sa 16 ka nagkadena nilang malas human gibihag ang Minnesota Timberwolves, 105-103, samtang ang Jazz nakabangon gikan sa walo ka sunod-sunod nilang pagkadagma human gipaksit ang Orlando Magic, 113-99.

Sa Indianapolis, ang Inadiana Pacers mipahagba sa Atlanta Hawks, 132-127.