Casimero target pa rin si Inoue

MANILA, Philippines — Hanggang ngayon, desidido pa rin si dating world champion John Riel Casimero na makaharap si undisputed world champ Naoya Inoue.

Sa kanyang post sa social media, sinabi nito kay eight-division world champion Manny Pacquiao na iharap sa kanya si Inoue dahil ito lamang ang makadudungis sa rekord ng Japanese fighter.

“Boss Manny Pacquiao itapat mo na yan sa akin yung Monster, wala naman ibang katapat yan kundi ako lang,” ani Casimero sa kanyang post.

Nagsalita si Casimero matapos tawagin ni Top Rank Promotions chief Bob Arum na mas legendary ang career ni Inoue kumpara kay Pacquiao.

Kaya naman agad na bumanat si Casimero upang sagutin ang sinabi ni Arum.

“Para matapos na yang agawan n’yo sa legacy, tulungan mo nga ako para magtuos na kami para tapos na ang isturya n’yo,” ani Casimero.

Sa isang panayam, sinabi ni Arum na  mataas ang respeto nito kay Pacquiao dahil sa mga tagumpay na nakamit nito sa kanyang boxing career.

Gayunpaman, bumanat pa ang American promoter na mas makulay ang boxing career ni Inoue — bagay na nagpataas sa kilay ng ilang boxing analysts at fans.

Tinukoy ni Arum ang malinis na rekord ni Inoue na undefeated sa 29 laban nito.

Kasalukuyang hawak ni Inoue ang korona sa WBA, WBC, IBF at WBO sa super bantamweight class.