EGS-solid north mikumpleto og 5-0 sweep sa Mayor's Cup
CEBU, Philippines — Ang EGS-Solid North milampornas sa Lymar Ballers, 93-76, aron pagkumpleto og 5-0 sweep sa eliminasyon sa 1st Mayor Raymond Alvin Garcia Cup Invitational Basketball Tournament 2025 niadtong Miyerkules sa gabii, Enero 29, diha sa Cebu City Sports Institute (CCSI) Gym sa Barangay Sawang Calero.
Sila si Leo Najorda, Goerelle Gonzalez ug Redel Fabro mitali og 12 puntos matag usa sa dihang ang EGS-Solid North miabante sa crossover semifinals batok sa Fiesta Gas sa San Carlos City, Negros Occidental.
Ang Fiesta Gas milukat sa ikaupat ug katapusang ticket sa semis human gipatikangkang ang Metro Cars x Stampede, 83-73.
Si Steve Castro maoy nangu sa Fiesta Gas uban ang 15 puntos, upat ka rebounds, duha ka assists ug tulo ka steals.
Lain pang upat ka Fiesta Gas ang mikadlit og double figures.
Si Gab Cometa mihipos og 13 puntos, unom ka assists ug duha ka steals samtang si Jonel Bonganciso miposte og double-double nga 12 puntos ug 13 ka rebounds uban ang upat ka assists.
Si Gileant Delator mitimbre sab 12 puntos samtang si Charles Pepito midugang og 10 puntos, 11 ka rebounds ug duha ka assists.
Sa laing sangka sa semis nga giduwa pa samtang sa pagsulat ning taho kagabii, nag-abot ang Team Khalifa sa Tacloban City ug ang bag-ohay pang gikoronahang Sinulog Cup champion RKF Iloilo.
- Latest
