Ginebra miregalo sa NorthPort sa numero unong puwesto

CEBU, Philippines — Ang Barangay Ginebra miregalo sa NorthPort sa numero unong puwesto human ilang gipukan ang Meralco Bolts, 91-87, sa PBA Commissioner's Cup didto sa Smart Araneta Coliseum sa Quezon City niadtong Miyerkules sa gabii.

Ang Gin Kings milusad og mainit nilang ratsada sa ikatulong kuwarter ug dayon nagsandig sa krusyal nga mga free throws ni RJ Abarrientos sa naghinapos nga bahin sa kulbahinam nga engkwentro aron bughaon ang Bolts.

Tungod niini, ang Ginebra mitapos sa ilang kampanya sa eliminasyon bitbit ang 8-4 nga baraha tabla sa Converge FiberXers.

Samtang ang Bolts natagak sa 7-4 hinungdan nga gisilyohan sa NorthPort ang No.1 spot uban ang 9-3 rekord nga naghatag sa Batang Pier og twice-to-beat advantage sa quarterfinals.

Ang TNT padayong nagsolo sa ikatulong dapit uban ang 8-3 nga marka.

Suwayan pag-angkon sa Tropang Giga ang laing twice-to-beat nga insentibo sa sunod nga hugna sa torneyo sa dihang ilang sangkaon ang Rain or Shine Elasto Painters sa katapusang duwa sa eliminasyon karong adlawa (Biyernes, Enero 31) didto sa PhilSports Arena sa Pasig City.

Sa laing bahin, si Mike Watkins mipaulbo og 41 puntos ug 14 ka rebounds aron pangulohan ang NLEX ngadto sa 94-76 nga paglampaso sa Hong Kong Eastern. Si Robert Bolick midugang og 21 puntos ug walo ka assists alang sa Road Warriors nga mikompayot sa ikawalong dapit uban ang 6-6 rekord.

Isip ikawalong koponan nga milansang og unom ka daog, ang NLEX mipapha sab sa tsansa sa 5-7 nga San Miguel Beermen nga makasud sa quarterfinals.

Mao kini ang unang higayon sud sa 10 ka tuig nga ang Beermen natagak sa eliminasyon pa lamang.