Vitor, Asilo mokumbati sa "Kumong Bol-anon XX"
CEBU, Philippines — Ang mga batos sa PMI Bohol Stable nga sila si Virgel "Valiente" Vitor ug Gerwin "The Gladiator" Asilo mowadwad sa ilang abilidad batok sa managlahing kontra sa “Kumong Bol-anon XX” sa PMI Bohol Boxing Promotions nga gitakda karong Marso 9 didto sa dakbayan sa Tagbilaran City.
Si Vitor (22-4, 15KOs) makigsinukliay og kumo ni Rey Ramos (8-16-03, 3KOs) gikan sa Cainta, Rizal sud sa unom ka hugna nga sangka ubos sa super featherweight division, samtang si Agilo mosakbang batok ni Jenny Boy "Camiguin Tiger" Boca (4-17, 12KOs) sa laing unom ka hugna nga bugno ubos sa bantamweight category. Misyon nilang Vitor ug Asilo nga makabangon sa miagi nilang kapakyasan.
Si Vitor nalangkatan sa iyang WBO Oriental super featherweight belt human gipilde pinaagi sa 5th round TKO ni Yeerjialahasi Laayibieke sa China sa miagi niyang away niadtong Huly 27 sa miaging tuig didto sa yuta niyang natawhan.
Sa iyang bahin, si Asilo miyukbo sa way pildeng Hapon nga si Tenshin Nasukawa pinaagi sa unanimous decision sa ilang WBO Asia-Pacific bantamweight title fight niadtong Oktubre 14, 2024 didto sa Ariake Arena sa Tokyo, Japan.
Mag-engkwentro sab sa kulbahinam nga pasundayag sila si Leonard Pores III (5-0, 4KOs) vs Dennis Gaviola (3-6-2, 2 KOs), Datu Adam (2-0, 2 KOs) vs Rex Bautista (3-2-1, 1KO) ug Freshler Utrera (1-0, 1KO) vs Jethro Lusorio (0-1).
- Latest
