RKF Iloilo naghari sa Sinulog Cup 2025

CEBU, Philippines — Giusban og parot sa RKF Iloilo ang Welec Trucking Services x AMC, 74-69, aron langkaton ang korona sa kampiyonato sa Sinulog Cup 2025 Basketball Tournament niadtong Dominggo sa gabii, Enero 26, didto sa Cebu Coliseum.

Si Cedrick Manzano mikolekta og double-double uban ang 16 puntos ug 17 ka rebounds sa dihang ang RKF Iloilo mitapos sa unom ka adlaw nga torneyo bitbit ang perpektong 5-0 rekord aron kubrahon ang P200,000 nga ganting salapi.

Sila si MJ de la Virgen ug Cedrick Ablaza midugang og 12 puntos matag usa alang sa RKF, nga alkansi og dos puntos, 65-67, sa pinal nga singko minutos apan mitak-op sa duwa pinaagi sa mianit nga 9-2 rally aron patikalbongon ang Welec.

Si Kent Ivo Salarda mipupo og 16 puntos, 15 ka rebounds ug duha ka assists alang sa Welec, nga mibulsa og P100,000 sa pagtapos nila sa ikaduhang dapit.

Sa laing bahin, ang University of Cebu (UC) Webmasters nakadawat og P50,000 sa pagpahiluna nila sa ikatulong puwesto human gilampaso ang Cebu City selection, 85-63.

Si Ricofer Sordilla maoy nangu sa Webmasters uban ang 16 puntos, upat ka rebounds, tulo ka assists ug usa ka steal.

Dako sab og naambag si Danie Boy Lapiz nga mihipos og 14 puntos, tulo ka rebounds ug upat ka steals ingon man si Jasper Pacaña nga mitali og 11 puntos ug lima ka rebounds alang sa Webmasters.