Khalifa, Metro Cars mikadlit sa unang daog
Mga duwa karon
CEBU, Philippines — Ang Team Khalifa sa Tacloban City ug ang Metro Cars x Stampede dali nga namawi sa miagi nilang kapildihan aron angkonon ang una nilang daog sa 1st Mayor Raymond Alvin Garcia Cup Invitational Basketball Tournament niadtong Dominggo sa gabii, Enero 26, diha sa Cebu City Sports Institute (CCSI) Gym sa Barangay Sawang Calero.
Si Jaybie Mantilla miharos og 19 puntos, lima ka rebounds, walo ka assists, tulo ka steals ug usa ka block aron pangulohan ang Khalifa ngadto sa kulbahinam nga daog, 102-98, sud sa overtime batok sa Fiesta Gas sa San Carlos City.
Laing upat ka players sa Khalifa ang mikadlit og double figures.
Si SJ Moore mi-iskor og 16 uban ang unom ka rebounds ug usa ka assist, si Jancork Cabahug midugang og 15 puntos ug tulo ka rebounds, samtang sila si Elmer Echavez ug Joel Lee Yu nagkumboya'g 21 puntos alang sa Khalifa, nga madasigong miresbak human maalkansi og siyete puntos, 72-79, sa naghinapos nga bahin sa katapusang kuwarter aron patikyaobon ang Fiesta Gas.
Sa laing sangka, si Darrel Villarosa mipabuto og 20 puntos uban ang tulo ka rebounds, duha ka assists ug duha ka steals aron ituboy ang Metro Cars ngadto sa 80-73 nga pagpakaging sa Lymar Ballers.
Si Jun Daanoy mihipos og 13 puntos, tulo ka rebounds ug duha ka assists, samtang sila si Raymart Escobido ug Jayson Balabag nagkumbinar og 21 puntos alang sa Metro Cars nga nagtabla karon uban ang Khalifa ug RKF Iloilo bitbit ang managsamang 1-1 nga baraha.
- Latest
