1st Mayor Garcia Cup EGS-Solid North gilihi-an og sagunson nga daog

CEBU, Philippines — Ang EGS-Solid North mainit nga misikad sa ilang kampanya uban ang duha ka sagunson nga daog sa 1st Mayor Raymond Alvin Garcia Cup Invitational Basketball Tournament 2025 niadtong weekend diha sa Cebu City Sports Institute (CCSI) Gym sa Barangay Sawang Calero.

Niadtong Sabado sa gabii, ang EGS mikolapso sa endgame apan nakamaneho pagpiog sa Team Khalifa sa Tacloban City, 79-76.

Gilangkoban og mga magduduwa sa Abra Weavers sa Maharlika Pilipinas Basketball League (MPBL), ang EGS miabante og 18 puntos, 63-45, ug naglabaw pa gihapon og dako, 77-63, sa tunga-tungang bahin sa katapusang kuwarter apan ang Khalifa mipasilaob og nagkayong 11-0 rally aron pagsikit ngadto na lang sa 74-77 sa hilimatyong segundos.

Apan ang EGS kalmadong miatubang sa presyur aron pag-ipsot ngadto sa tres puntos nga kadaogan.

Si Kasius Small-Martin maoy nangu sa EGS uban ang 17 puntos ug lima ka assits. Sila si Encho Serrano ug Jack Cruz-Dumont midugang og 12 puntos matag usa samtang si John Uduba miamot og double-double nga 10 puntos ug 10 ka rebounds.

Sila si Jaybie Mantilla ug Jancork Cabahug mitagak og managsamang 18 puntos samtang si Elmer Echavez mitali og 10 puntos apan nakawang ang ilang paningkamot sa Khalifa.

Lahi na kaayo ang estorya sa EGS atol sa ikaduha nilang duwa niadtong Dominggo sa buntag gumikan kay ila mang gikulata ang RKF Iloilo, 86-65.

Ning higayona, si Uduba ang bida bitbit ang 18 puntos, walo ka rebounds ug duha ka steals alang sa EGS, nga milusad og eksplosibong 17-0 run sa katapusang kuwarter nga nakapaburot sa ilang labaw ngadto sa 23 puntos, 79-56.

Ang EGS nagkupot na karon og 2-0 rekord samtang ang RKF natagak sa 1-1.

Sa wala pa sila gipayaka sa EGS, ang RKF milampornas sa Stampede/Metro Cars, 90-77.

Si Jeckster Apinan mikadlit og 16 puntos alang sa RKF, sila si Wilmer Dalumpines ug Raffy Arguelles nagkumboya'g 29 puntos, samtang sila si Jaypee Belencion ug Cedrick Manzano parehong miamot og 12 puntos.

Sa laing resulta, ang Fiesta Gas sa San Carlos City mipaksit sa Lymar Ballers, 103-87.

Lima ka batos sa Fiesta Gas ang mirehistro og double figures nga gipangulohan nilang Ming Minguito ug Jonel Bonganciso nga mikolekta og 15 puntos matag usa. Giabagan sila nilang Gab Cometa, Steve Castro ug Jiesel Tarrosa nga nagkumbinar og 37 puntos.