NorthPort mipahayag sa Top 2 nilang tinguha
CEBU, Philippines — Ang NorthPort midemolis sa Blackwater, 120-93, aron pahayagan ang ilang kampanya nga maka-angkon og luna sa Top 2 sa PBA Commissioner's Cup didto sa Ynares Center sa Antipolo City niadtong Sabado sa gabii.
Sila si Kadeem Jack, Joshua Munzon ug Arvin Tolentino maoy nangu sa Batang Pier ngadto sa impresibong kadaogan sa katapusan nilang duwa sa elminasyon.
Si Jack mipabuto og 30 puntos, si Munzon mi-iskor og 21 samtang si Tolentino mirehistro sa ikaduhang triple-double sa iyang karera uban ang 14 puntos, 10 ka rebounds ug 11 ka assists aron ituboy ang NorthPort ngadto sa temporaryong liderato bitbit ang 9-3 rekord.
Ang tsansa sa NorthPort nga makabira og puwesto sa Top 2 nga dunay twice-to-beat advantage sa quarterfinals magdepende sa resulta sa ubang mga duwa sa Hong Kong Eastern, Meralco Bolts ug TNT Tropang Giga nga sa kasamtangang parehong nagkupot og 7-3 nga baraha.
Sa laing bahin, ang NLEX Road Warriors mipaluhod sa Rain or Shine Elasto Painters, 122-110, aron palig-onon ang ilang laraw nga makasud sa playoffs.
Si Robert Bolick mipaulbo og 40 puntos alang sa Road Warriors, nga nakatabla sa ikawalong puwesto uban ang San Miguel Beermen bitbit ang managsamang 5-6 nga marka.
- Latest
