Celtics milampaso sa Mavs sa NBA Finals rematch

CEBU, Philippines — Gidominar sa Boston Celtics ang Dallas Mavericks, 122-107, sa ilang NBA Finals rematch kagahapong adlawa didto sa American Airlines Center sa Dallas, Texas.

Si Jayson Tatum mihipos og 24 puntos, samtang sila si Derrick White ug Jaylen Brown nagkumbinar og 45 puntos alang sa Celtics, nga namawi sa makapadismaya nilang 21 puntos nga kapildihan sa mga kamot sa Los Angeles Lakers sa miagi nilang duwa.

Si Kyrie Irving maoy nangu sa Mavs uban ang 22 puntos apan si Klay Thompson nalimitahan ngadto lamang sa sayes puntos.

Didto sa Cleveland, ang Rockets namugnaw human miposte og 19 puntos nga labaw sa second half apan nakamaneho pag-ipsot ngadto sa 135-131 nga kadaogan batok sa Cavaliers.

Sila si Alperen Sengun ug Jalen Green mikolekta og 26 puntos matag usa alang sa Rockets, samtang si Amen Thompson miharos og 23 puntos, 14 ka rebounds ug 10 ka assists alang sa Rockets.

Sila si Darius Garland ug Donovan Mitchell nagkumboya'g 72 puntos apan nangaminghoy kay ang Cavs natagak sa 36-9 human masagunsonan og tulo ka pilde sa unang higayon ning season.

Didto sa Paris, si Tyrese Haliburton mibomba og 16 sa iyang 28 puntos sa ikatulong kuwarter aron ituboy ang Indiana Pacers ngadto sa 136-98 nga paglampornas sa San Antonio Spurs.

Sa ubang mga resulta, si Anthony Davis mikulit og 36 puntos ug 13 ka rebounds sa dihang gipahilom sa Los Angeles Lakers ang Golden State Warriors, 118-108, samtang si Anthony Edwards mikadlit og 34 puntos ug siyam ka assists aron ituboy ang Minnesota Timberwolves ngadto sa 133-104 nga pagdagit sa Denver Nuggets.