RKF Iloilo 3-0 na sa Sinulog cup
CEBU, Philippines — Ang way pildeng RKF Iloilo miinat sa mainit nilang ratsada ngadto sa tulo ka duwa human gilampornas ang Team Frasco-Liloan, 107-79, sa Sinulog Cup 2025 Basketball Tournament niadtong Biyernes sa gabii, Enero 24, sa Cebu Coliseum.
Si Wilmer Dalumpines mitali og 11 puntos, usa ka rebound ug duha ka assists samtang si Joshua Maquiling mirehistro og double-double nga 10 puntos ug 12 ka rebounds alang sa RKF, nga mitagak og 35-11 nga bomba sa ikaduhang kuwarter aron pagposte og dakong 58-34 bentaha sa halftime.
Sila si Cedrick Manzano ug Marvin Cuerbo midugang og 10 puntos matag usa alang sa RKF, kansang pinakadako nga labaw nagbarog sa 31 puntos, 92-61, sa sayong bahin sa katapusang kuwarter.
Sa laing duwa, ang Welec Trucking Services x AMC mitak-op sa ilang kampanya sa eliminasyon bitbit ang 3-1 rekord human sila nakaipsot sa Cebu City selection, 79-77.
Si Reinhard Jumamoy maoy nangu sa Welec uban ang 17 puntos, duha ka rebounds ug pito ka assists.
Nagparamdam sab si Gabriel Cometa nga mihipos og 14 puntos, upat ka rebounds ug lima ka assists ingon man si Kenneth Brillo nga mikimada og 12 puntos ug lima ka rebounds alang sa Welec.
Ang Welec mikolapso human miabante og 11 puntos, 74-63, sa pinal nga singko minutos apan mipakita og igong katakos sa hilimatyong segundos aron pag-eskapo ngadto sa dos puntos nga kadaogan.
Ang kampiyonato sa unom ka adlaw nga torneyo duwaon karong adlawa (Dominggo, Enero 26) apan ang mga finalists madetermina sa resulta sa sangka tali sa RKF ug University of Cebu (UC) Webmasters nga giduwa pa samtang sa pagsulat ning taho kagabii.
- Latest
