CEBU, Philippines — Sila si Paul George ug Tyrese Maxey nagkumbinar og 59 puntos sa dihang gipakgang sa Philadelphia 76ers ang pito nila ka sagunson nga pilde human gibihag ang inilog nga Cleveland Cavaliers, 132-129, sa NBA kagahapong adlawa didto sa Wells Fargo Center sa Philadelphia, Pennsylvannia.
Si George milansang og unom ka 3-pointers sa iyang 30 puntos samtang si Maxey mikadlit og 29 puntos apil niini ang upat ka krusyal nga free throws sa hilimatyong segundos nga maoy nagtuldok sa kulbahinam nga daog sa Sixers.
Ang pagtumba nila sa higanteng Cavs gipaabot nga makahatag og dugang kadasig sa Sixers sa umaabot nilang mga duwa ilabi na kay anaa sila karon sa halayo nga puwesto sa Eastern Conference standings uban ang 15-27 rekord.
Gawas nilang George ug Maxey, lain pang upat ka Sixers ang mikadlit og double-digit. Si Kelly Oubre Jr. mitapos uban ang 22 puntos, 13 ka rebounds ug tulo ka steals, sila si Eric Gordon ug Justin Edwards mipupo og 15 puntos matag usa, samtang si Guerschon Yabusele miamot og 12 puntos.
Si Donovan Mitchell mitagak og 37 puntos, si Ty Jerome mi-iskor og 33, samtang si Darius Garland midugang og 26 puntos apan wala sila makapugong sa Cavs nga makatilaw sa ikawalo niining pilde nga giatbangan og 36 ka daog.
Sa laing duwa, ang Memphis Grizzlies mipakaging sa New Orleans Pelicans, 139-126.
Ang Grizzlies nagkupot na karon og 30-15 nga baraha human mirehistro sa ikalima nilang sagunson nga daog.
Didto sa Charlotte, ang Hornets giugbok sa bisita nilang Portland Trail Blazers, 102-97.