CEBU, Philippines — Ang 2025 nga edisyon sa binulan nga torneyo sa Cebu Executives and Professionals Chess Association (CEPCA) mosikad na sa ala-1 sa hapon karong adlawa (Dominggo, Enero 26) diha sa Robinsons Galleria Cebu.
Gipaluyohan ni CEPCA President Engr. Jerry Maratas inabagan ni Dr. Edwin Cablao, ang kulbahinam nga pinug-anay sa utok eksklusibo sa mga Cepcans, seniors, ladies ug 12 Under players. Ang makampiyon mobulsa og P3,000 samtang ang mopahiluna sa ikaduha ngadto sa ikalimang dapit makadawat og P1,500, P1,000, P750 ug P500.
Duna say P300 nga insentibo ang top Cepcan, lady, senior ug kiddie performers.
Gawas sa ganting salapi, ang nag-unang mananaog matag kategoriya (Cepcan A ug B) makaangkon sab og luna sa CEPCA "Battle of Champions" karong Disiembre.
Ang rehistrasyon nagkantidad og P150 alang sa ladies, seniors ug kids, P200 alang sa Cepcans ug P300 alang sa dili mga aktibo ug wala nagbayad nga mga miyembro sa club.
Alang sa dugang impormasyon, mahimong mokontak ni Kevin Yap (09458559800) o ni Edwin Cablao (09171383181).