Sinulog Cup 2025 UC Webmasters, Welec gisugat og kadaogan

CEBU, Philippines — Gisubhan og daog sa University of Cebu (UC) Webmasters ug Welec Trucking Services x AMC ang ilang kampanya sa Sinulog Cup 2025 Basketball Tournament niadtong Martes sa gabii, Enero 21, didto saa Cebu Coliseum.    

Si Ricofer Sordilla mipabuto og 20 puntos uban ang duha ka assists, usa ka rebound ug usa ka steal aron pangulogan ang Webmasters ngadto sa 79-74 nga pagpakaging sa Cebu City selection.

Midugang si Luther Leonard og 12 puntos, pito ka rebounds, duha ka assists, usa ka steal ug usa ka block , samtang si Steven Ursal mi-iskor og siyete puntos ug milangkat og 14 ka rebounds alang sa Webmasters, nga milusad og nagkayong 10-0 rally aron kontrolahon ang duwa sa hingpit uban ang 66-56 nga bentaha sa sayong bahin sa katapusang kuwarter.

Si Zaionyl Rosano mitali og 18 puntos, unom ka rebounds ug duha ka steals samtang sila si Karl Cabulao ug Jeff Gudes mihipos og 12 puntos matag usa apan nakawang ang ilang paningkamot sa Cebu City selection.

Sa laing bahin, ang Welec midemolis sa Team Frasco sa Liloan, 95-77.

Si 2023 Cebu Schools Athletic Foundation, Inc. (CESAFI) MVP Kent Ivo Salarda maoy nangu sa Welec bitbit ang 19 puntos, duha ka rebounds ug duha ka assists.

Sila si Ivan Clark Alsola ug Zylle Cabellon, mga teammates ni Salarda uban sa University of the Visayas (UV) Green Lancers nga naka-grandslam sa CESAFI Season 24 sa miaing tuig, mikuha sab og atensiyon.

Si Alsola mirehistro og double-double nga 15 puntos ug 10 ka rebounds, samtang si Cabellon midonar og 13 puntos ug upat ka assists.

Wala sab magpabitin ang kanhi CESAFI 3-Point King nga si Froilan Mangubat nga mikimada og 15 puntos, lima ka rebounds ug duha ka assists alang sa dominanteng Welec, nga sa usa ka higayon naglabaw og 30 puntos, 70-40, sa nagihinapos nga bahin sa ikatulong kuwarter.

Sila si Earl Jethro Tautho ug Uri Avila nagkumboya'g 27 puntos sa pilderong Team Frasco.