LeBron, Jokic nangu sa ilang teams uban ang triple-double

CEBU, Philippines — Sila si LeBron James ug Nikola Jokic parehong mikadlit og triple-double aron panguloghan ang tagsa-tagsa nila ka koponan ngadto sa kadaogan.

Si James miharos og 21 puntos, 13 ka rebounds ug 10 ka assists aron ibandera ang Los Angeles Lakers ngadto sa 111-88 nga paglampornas sa nagkagidlay nga Washington Wizards sa NBA kagahapong adlawa didto sa Crypto.com Arena sa LA, California.

Mao kadto ang ikasiyam nga triple-double ni James ning season ug ika-121 sa kinatibuk-an sa iyangh karera.

Si Anthony Davis mipaulbo og 29 puntos ug 16 ka rebounds samtang sila si Dorian Finney-Smith ug Austin Reaves mihipos og 16 puntos matag usa alang sa Wizards nga misukarap sa ika-11 nilang sunod-sunod nga pilde.

Didto sa Ball Arena sa Denver, Colorado, si Nikola Jokic mireshistro sa ikaupat niyang sagunson nga triple-double sa dihang gilampaso sa Denver Nuggets ang Philadelphia 76ers, 144-109.

Ang three-time MVP mipupo og 27 puntos, 13 ka rebounds ug 10 ka assists aron tabangan ang Nuggets pagkadlit sa ika-27 nilang daog ning season.

Si Jokic usa sa unom ka Nuggets nga milansang og double figures.

Si Christian Braun midugang og 20 puntos samtang si Michael Porter Jr. miamot og 19 puntos human nakapasud og walo sa 13 niya ka itsa.

Nagkupot si Porter og dako nga papel sa dihang giinat sa Nuggets ang ilang labaw ngadto sa 91-73 sa ikatulong kuwarter. Miposa siya og duha ka 3-pointers ug mipasa og maanindot nga assist ngadto ni Russell Westbrook sa mainit nilang 14-4 rally.

Dako sab og naambag si Westbrook nga mihipos og 11 puntos, pito ka rebounds ug siyam ka assists.

Si Tyrese Maxey maoy nangu sa Sixers uban ang 28 puntos ug 10 ka assists. Si Paul George mihipos og 11 puntos, lima ka rebounds ug pito ka assists sa pilderong kawsa.