Thunder namawi, gipahimungtan ang Nets

CEBU, Philippines — Si Shai Gilgeous-Alexander mikadlit og 27 puntos sa dihang ang Oklahoma City Thunder namawi sa miagi nilang kapildihan ug gipahimungtan sa ilang kapungot ang nagkagidlay nga Brooklyn Nets, 127-101, a NBA kagahapong adlawa didto sa Paycom Center sa OKC.

Midugang og si Gilgeous-Alexander og 10 ka assists ug upat ka steals sa 26 puntos nilang demolisyon sa Nets. Wala na sila molingi pa sukad misutoy ngadto sa 39-19 nga labaw human sa unang kuwarter.

Padayong naghari ang Thunder sa Western Conference uban ang 35-7 rekord.

Sa laing bahin, si Nikola Jokic milansang sa ika-18 niyang triple double ning season aron pangulohan ang Denver Nuggets ngadto sa 113-100 nga pagpayaka sa Orlando Magic.

Si Jokic miharos og 20 puntos, 14 ka rebounds, 10 ka assists, tulo ka steals ug tuloa ka blocks alang sa Nuggets nga ikaupat karon sa West bitbit ang 26-16 nga baraha.

Didto sa Milwaukee, si Giannis Antetokounmpo mipabuhagay og 34 puntos aton ituboy ang Bucks ngadto sa 123-109 nga pagpatikangkang sa Philadelphia 76ers.

Wala sab magpabitin si Damian Lillard nga mitali og 16 sa iyang 25 puntos sa katapusang kuwarter alang sa Bucks, kansang 24-17 nga marka nagbutang kanila sa ikaupat nga puwesto sa East.

Sa ubang mga resulta, sila si Kel'el Ware ug Duncan Robinson nagkumbinar og 46 puntos sa dihang ang Miami Heat milampaso sa San Antonio Spurs, 128-107, samtang sila si Norman Powell, James Harden ug Ivica Zubac nagkumboya'g 64 puntos sa dihang ang Los Angeles Clippers milupig sa silingan nilang Lakers, 116-102.