Tropang Giga miangkon sa liderato sa PBA

CEBU, Philippines — Si Calvin Oftana milansang og unom ka tres sa iyang 32 puntos sa dihang ang TNT Tropang Giga nakasugakod sa mainit nga endgame rally sa Barangay Ginebra aron inaton ang sagunson nilang daog ngadto sa unom ka duwa ug ilogon ang liderato sa PBA Commissioner's Cup didto sa PhilSports Arena sa Pasig City niadtong Biyernes sa gabii.

Mihimo sab og kasikas si Rondae Hollis-Jefferson nga mikadlit og 25 puntos ug way sipyat sa 13 niya ka free throws aron tabangan ang Tropang Giga pagpiog sa Gin Kings, 91-86, ug tay-ogon ang standings.

Ang TNT mao na ang temporaryong lider ning komperensiya uban ang 6-2 rekord samtang ang Ginebra natagak sa ikapitong puwesto bitbit ang 6-4 nga baraha.

Gilabyan sa Tropang Giga ang NorthPort Batang Pier, Hong Kong Eastern, ug Converge FiberXers nga parehong nagkupot og 7-3 nga marka.

Tungod niini, sikit kaayo ang karera alang sa Top 2 nga magabaton og twice-to-beat nga bentaha sa quarterfinals diin ang Meralco Bolts ug Rain or Shine Elasto Painters duna pa say tsansa uban ang managsamang 6-3 nga baraha.

Mao sab kini ang gitiradahan sa FiberXers sa dihang ilang sangkaon ang Blackwater Bossing karong adlawa(Dominggo, Enero 19) didto sa Ynares Center sa Antipolo.

Kon ugaling mapilde sa Converge ang Blackwater ingon man ang San Miguel Beer sa katapusang nilang duwa sa eliminasyon sunod semana, dako kaayo ang tsansa nga makaangkon sila og luna sa Top 2 nga kinahanglan lamang modaog kausa batok sa ilang makontra sa playoffs aron moabante sa semifinals.