Talisay kampiyon sa CSBF Permiro Distrito 40UP Basketball League
CEBU, Philippines — Ang Talisay City nakaipsot sa Minglanilla, 98-96, sa ilang knockout final match aron langkaton ang titulo sa kampiyonato sa Cebu South Basketball Federation (CSBF) Permiro Distrito 40UP Basketball League didto sa Minglanilla Sports Complex ning bag-ohay pa lamang.
Sa pinal nga otso segundos sa kulbahinam kaayong sangka, ang Minglanilla duna pa untay tsansa nga modaog o makapuwersa og overtime apan ang mga Talisaynons migamit sa hugot kaayo nilang depensa aron pugngan ang ilang mga karibal nga makaitsa sa katapusang higayon.
Si Reymond "Ampor" Tabar mipabuto og 27 puntos alang sa Talisay hinungdan nga siya maoy gibayaw nga Finals MVP.
Sa bugno alang sa ikatulong dapit, ang Carcar City yanong mipatikangkang sa San Fernando, 97-77.
Giorganisa sa CSBF nga gipangulohan ni Edgar Aton inabagan sa Professional Youth Fellowship Basketball Advocacy (PYFBA) ni Deej Villanueva, ang liga nahimong posible tungod sa suporta ni kongresista Rhea Gullas sa Unang Distrito sa Sugbo ug San Fernando Mayor Mytha Canoy.
- Latest
