FiberXers mikatkat sa ikaduhang dapit

CEBU, Philippines — Ang Converge FiberXers naka-iskor lamang og sayes puntos sa nag-unang 12 minutos sa aksiyon apan mipabuto og 30 puntos sa ikaduhang kuwarter dayon na ngadto sa pagpiog sa Rain or Shine Elasto Painters, 103-96, sa PBA Commissioner's Cup didto sa Ninoy Aquino Stadium niadtong Martes sa gabii.

Nakab-ot sa FiberXers ang krusyal nga kadaogan bisan og ang import nilang Cheick Diallo miduwa nga dili maayo ang paminaw.

Salamat sa lokal nilang mga batos, ang Converge nakagawas sa upat ka teams nga panagtabla sa ikaupat nga puwesto uban ang Hong Kong Eastern, Barangay Ginebra ug Meralco.

Sila si Alec Stockton, Jordan Heading ug Justin Arana mikuha og atensiyon sa dihang ang FiberXers milayat sa ikaduhang puwesto bitbit ang 7-3 rekord.

Nakasikit sila sa NorthPort, nga natagak sa 7-2 human mahisukamod sa mga kamot sa Meralco Bolts, 94-111.

Tungod sa ilang kadaogan, ang Converge ni coach Franco Atienza duna pay tsansa nga makasud sa Top 2 nga magabaton og twice-to-beat advantage sa quarterfinals.

Ila kining maangkon kon molampus sila sa katapuysan nilang duwa sa eliminasyon batok sa Blackwater karong Enero 19 ug San Miguel Beer karong Enero 24.

Si Stockton mibubo og 17 sa iyang 21 puntos sa katapusang kuwarter samtang sila si Heading ug Arana nagkumboya'g 32 puntos alang sa Converge.   

Si Jhonard Clarito mikadlit og 24 puntos samtang si Deon Thompson midugang og 22 puntos apan nakawang ang ilang paningkamot sa habig sa Rain or Shine.