Pacers miputol ratsada sa cavs

CEBU, Philippines — Madasigong gipapha sa Indiana Pacers ang 15 puntos nilang alkansi sa second half aron putlon ang 12 ka sagunson nga daog sa Cleveland Cavaliers sa iskor nga 108-93 sa NBA kagahapong adlawa didto sa  Rocket Mortgage FieldHouse sa Cleveland, Ohio.

Si Andrew Nembhard mikadlit og 19 puntos, si Pascal Siakam mi-iskor og 18 samtang si Myles Turner midugang og 15 puntos ug 10 ka rebounds alang sa Pacers, nga nakasugakod sa pagbiya sa star guard nilang si Tyrese Haliburton sa halftime kay nayayay ang paa.

Ang Pacers mipatilaw sa Cavs sa ikaduha pa lamang niining pilde didto sa ilang korte ning season samtang giinat ang mainit nilang ratsada ngadtio sa unom ka duwa.

Si Darius Garland mipupo og 20 puntos ug pito ka assists alang sa Cavs, nga miposte og 53-40 nga labaw sa first half nga ila pang gibitad ngadto sa 60-45 sa sayong bahin sa ikatulong kuwarter.

Apan sila si Bennedict Mathurin ug Obi Toppin mibomba og 10 puntos matag usa sa ikatulong kuwarter diin gilabhan sa Pacers ang Cavs, 37-18, aron kontrolahon ang duwa sa hingpit.

Didto sa Boston, si Jayson Tatum miharos og 38 puntos ug 11 ka rebounds aron ituboy ang Celtics ngadto sa 120-119 nga pagpatikangkang sa New Orleans Pelicans.

Sa laing aksiyon, si Shai Gilgeous-Alexander mipasud lamang og lima sa 17 niya ka itsa apan nakamaneho pagkulit og 27 puntos aron pangulohan ang Oklahoma City Thunder ngadto sa 136-95 nga paglampornas sa Washington Wizards.

Samtang nang Denver Nuggets, luyo sa pagpanginit nilang Russell Westbrook ug Nikola Jokic, impresibong mibangon human malubong og 19 puntos sa ikatulong kuwarter dayon na ngadto sa pagpatikalbong sa Dallas Mavericks, 112-101.

Si Westbrook mihipos og 21 puntos, 10 ka rebounds ug pito ka assists, samtang si Jokic mitimnbre og 19 puntos, 18 ka rebounds ug siyam ka assists alang sa Nuggets nga mikastigo sa Mavs, 33-12, sa pinal nga 12 minutos sa aksiyon.    

Didto sa New York, si Jalen Brunson mipatuasik og 44 puntos ug si Karl-Anthony Towns miharos og 30 puntos ug 18 ka rebounds aron ibandera ang Knicks ngadto sa 140-106 nga paglampaso sa Milwaukee Bucks.