Lapiz milampos na gyud human sa tulo ka pagsuway

Si Artjoy Torregosa milampos pagdepensa sa iyang trono samtang si Florendo Lapiz nasuwertian na gyud sa ikatulong higayon sa men's 42-kilometer division sa AIA Cebu Marathon 2025 didto sa SM Seaside City kagahapong adlawa.

Bisan og gihilanat duha ka adlaw sa dili pa ang lumba, ang 25-anyos nga si Torregosa nagkamaneho paghuman sa makutas nga lumba uban ang personal best nga tulo ka oras, sayes minutos ug 52 segundos, mas paspas og singko minutos sa gipatak niyang 3:12:14 sa miaging tuig.

Tungod sa iyang kadaogan, ang garbo sa Esperanza, Agusan del Sur nadasig og samot nga ipadayon ang iyang plano nga moapil sa tryouts alang sa Philippine team pinaagi sa National Open karong Marso didto sa kaulohan.

Si Kaye Candangan nahimutang sa halayo nga ikaduhang dapit sa oras nga 3:21:24 ug gisundan kini ni Lizane Abella nga miposte og oras nga 3:29:09.

Sa men’s 42K, si Lapiz, nga usa welder gikan sa Bukidnon nga nagdamgo sab nga makasud sa national team sa umaabot, misakmit na gyud sa gihandum niyang titulo sa ikatulo niyang pagsuway human mirehistro sa labing paspas nga oras sa tanan nga midagan lamang og duha ka oras, 38 minutos ug 27 segundos.

Si Mark Kevin Revilla nalandig sa ikaduhang dapit sa oras nga 2:49:51, samtang si Andy Toniacao mipahiluna sa ikatulong puwestro sa oras nga 2:58:19.

Sa 25K, si Prince Joey Lee munashinhawang mipilde ni Gimar Magdalino aron birahon ang korona sa men's category sa oras nga 1:27:15. Segundos lamang ang gintang nila ni Magdalino nga mitikang sa finish line sa oras nga 1:28:28 samtang si James Palma mitapos nga ikatulo sa oras nga 1:35:23.

Si Cherry Andrin maoy gikoronahang hara sa women's division sa oras nga 1:47:03. Sila si Stephanie Cadosale (1:55:02)ug Lijeaven Noay (1:56:26) ang miokupar sa sunod nga duha ka puwesto.

Sa laiung bahin, sila si Ricky Organiza ug Jessa Mae Roda ang nanghawod sa 12K action.

Si Organiza milangkat sa men's title sa oras nga 39 minutos ug 11 segundos. Sila si Franklin Ferdie (39:57) ug national triathlete Andrew Kim Remolino (40:21) mitapos sa ikaduha ug ikatulong dapit.

Si Roda ang midominar sa women’s 12K sa oras nga 50:01 ug gisundan kini nilang Afjeel Clampiano (51:09) ug Raven Alcoseba (51:56).

Sa 6K, ang Top 3 finishers mao sila si Noli Torre (19:56), Janry Pelones (20:20) ug Jayve Duha (21:15) sa men's ug Asia Paraase (25:08), Cathy Lingcong (26:05) ug Jane Pangalao (26:29) sa women's class.

Si Ja Morant sa Memphis Grizzlies way kurat nga milusot batok sa Minnesota Timberwolves atol sa ilang duwa sa NBA kagahapong adlawa didto sa Target Center sa Minneapolis, Minnesota.