Pistons mimakmak sa Wolves bisan sa 53-puntos ni Edwards

CEBU, Philippines — Paigo ra ang 40 puntos ni Cade Cunningham sa Detroit Pistons aron mopabor kanila ang resulta bisan pa sa career-high 53 points ni Anthony Edwards sa Minnesota Timberwolves, 119-105.

Si Edwards, kinsa nasagmuyo tungod sa average nga 16.3 points sa nakalabay nga tulo niya ka duwa tungod pirme siyang atbangan og double-team defense, nakalighot gihapon sa Pistons aron makakolekta og mga puntos.   

Napasulod niya ang 16 sa iyang 31 ka itsa apil ang 10 sa 15 niya ka three-pointers ug 11 sa iyang 12 ka free-throw attempts.

Apan mao ra kadto, siya ra maoy naninguha nga makapuntos para sa iyang koponan gikan sa pagsugod batok sa Pistons nga gipangunahan ni Cunningham, nga nikulit sab og kaugalingong season high sa puntos nga gibulakan og unom ka rebounds ug siyam ka assists.

Dili parehas kang Edwards, daghang nisuporta kang Cunningham.  Si Malik Beasley sa bench nakapuno og 23 puntos para sa Pistons, ug ingon man silang Tobias Harris 16 points, 11 rebounds samtang si Ausar Thompson nakahipos sab og 10 puntos, 10 rebounds ug unom ka steals.

Samtang sa San Antonio, niiskor si Nikola Jokic og 46 points ug milangkat og 10 rebounds para sa Denver Nuggets nga dili maayong regalo para sa Spurs star player nga si Victor Wembanyama nga nagsaulog sa iyang ika- 21 nga birthday pinaagi sa overtime 122-111 batok sa Spurs. Si Wembanyama naka-iskor hinuon og 20 points ug 23 rebounds uban sa tulo ka assists ug upat ka blocks.

Apan bisan sa pagkamas sa French star sa naghinapos nga bahin sa duwa wala siya makapuntos sa overtime.

Samtang silang Harrison Barnes mitampo sab og 22 points para sa San Antonio ug Devin Vassell 19. Si Vasell maoy nakapatabla sa iskor 108-108 sa iyang put-back basket sa nahibiling 14 segundos sa regulation.

Bisan nasipyat ang unta winning-shot ni Jokic sud sa regulasyon, namawi siya sa overtime pinaagi sa iyang siyam ka puntos. Nalupig ang Spurs sa puntosay sa overtime dihang nipupo ang Nuggets og 14 puntos batok sa tres puntos lang sa pikas.

Ang Serbian star, nga nakadawat og NBA Most Valuable Player award sa ikatulong higayon sa nakalabay nga season, nipuno og 10 assists, duha ka steals ug duha ka blocked shots.

Didto sa Brooklyn, miiskor si Joel Embiid og 28 points ug nilangkat og 12 rebounds aron makadaog ang Philadelphia 76ers  batok sa nangiwit nga Nets, 123-94. Nakahipos og 18 puntos si Tyrese Maxey samtang silang Paul George ug Caleb Martin mitampo sab og tag 17 puntos para sa Sixers, nga nilabaw og maayo sa halftime 64-47.

Sa laing duwa, nagselebrar ang Los Angeles Clippers karon nga season kay nakabalik na og duwa ang two-time NBA champion nilang si Kawhi Leonard nga nakatabang sa ilang 131-105 nga kadaugan batok sa Atlanta Hawks.

Si Leonard wala makaduwa sugod pa niadtong Abril 26, wala siya makaduwa sulod sa 12 ka games sa kataposang 14 ka duwa sa Clippers sa nakalabay nga season tungod sa paghubag sa iyang tuhod.  Sa pagsugod palang sa duwa, nakahipos dayon og 12 puntos si Leonard, usa niini tres puntos batok sa standout rookie sa Atlanta nga si Zaccharie Risacher.

Nihipos dayun og tulo ka rebounds usa ka assist ug steal wala pay 20 minutos gikan sa pagsugod si Leonard.

Samtang bisan wala makaduwa si Golden State Warriors superstar Stephen Curry, nakalingkawas napukan nila ang Memphis Grizzlies tungod sa pagpanguna nilang Andre Wiggins sa iyang 24 points ug 17 points ni Dennis Schroder, 121-113 nga kadaugan. – /IBM