Yulo maoy Athlete of the Year
CEBU, Philippines — May lain pa ba? Gibayaw isip Athlete of the Year si Carlos Yulo. Ang gibansagang human dynamo gymnast mikulit og kasaysayan sa Pilipinas isip labing unang Filipino athlete nga makasungkit og duha ka gold medals sa Olympics nga nitakdo sab sa selebrasyon sa nasud nga usa ka siglo ng nisalmot sa Summer Games.
Ang 24-anyos nga si Yulo, milangkat og talagsaong double gold sa men’s floor exercise ug vault, aron patilawon ang Pilipinas sa labing una niining double gold sukad sa pagsalmot sa maong sport.
Tungod sa katalagsaon nga kini mahitabo, wala nay daghang estorya, nagawas-awas ang suporta aron ideklarar si Yulo isip 2024 Athlete of the Year sa Philippine Sportswriters Association (PSA) sa umaabot nga Awards Night nga himuon karong Enero 27 sa Centennial Hall sa The Manila Hotel.
Siya mao ang unang gymnast sukad kang Pia Adelle Reyes niadtong 1997 aron ilhong Athlete of the Year sa labing karaang media organization sa nasud sa umaabot nga traditional gala night nga gipaluyohan sa San Miguel Corp. ug co-presented sa ArenaPlus, Cignal, ug ingon man sa MediaQuest.
Gawas sa Athlete of the Year, daghan pang mga awards ang iyang pagadawaton nga naka lined up atol sa formal presentation nga magagikan sa Philippine Sports Commission, Philippine Olympic Committee, Milo, PLDT/Smart, Sen. Bong Go ug Januarius Holdings isip mga major sponsors uban sa suporta gikan sa PBA, PVL, 1-Pacman Party List, AcroCity, Rain or Shine ug Akari.
Samtang ihatag sab anang adlawa ang NSA of the Year, Major Awardees sa ubang mga sports, President’s Award, Executive of the Year, Citations, Tony Siddayao Awards, lakip ang Hall of Fame ug Special Recognition to Filipino Olympians – apil na niini ang nangapil sa Paris Olympics ug Paralympics– agi og pag-ila sa ilang dakong kontribusyon sa paugnat sa kusog sa Pilipinas sa nakalabay nga tuig.
“From a great Olympic performance to an even greater Olympic show, and from one big breakthrough to an even bigger breakthrough – thanks to Carlos Yulo whose giant feat we will celebrate in handling him our highest accolades,” matud pa ni PSA President Nelson Beltran, sports editor sa The Philippine STAR, bahin sa pag-ila kang Yulo.— /IBM
- Latest
