Gin Kings, Beermen mag-abot sa eksplosibong sangka

CEBU, Philippines —  Ang Barangay Ginebra Kings ug ang San Miguel Beermen mag-abot sa seguradong usa ka eksplosibong sangka sa pagbalik sa aksiyon sa PBA Commissioner's Cup karong adlawa didto sa Smart Araneta Coliseum.

Managlahi ang misyon sa duha ka mainit nga karibal sa ilang engkwentro nga gikatakda sa alas 7:30 sa gabii.

Human giregalohan ang ilang kaugalingon ug ang ilang mga fans og tam-is nga kadaogan niadtong adlaw sa Pasko, buot sa Gin Kings nga sugaton ang bag-ong tuig pinaagi sa usa ka masipang buto.

Samtang ang Beermen naglungot-lungot nga makabawos sa sa Gin Kings nga mitagak kanila sa semifinals sa miaging komperensiya.

Sa kasamtangan, ang Ginebra ni coach Tim Cone nagkupot og 4-2 win-loss record.

Ikalima sila karon sa standings sunod sa NorthPort Batang Pier (6-1), Rain or Shine Elasto Painters (4-1) ug Hong Kong Eastern ug Converge FiberXers nga parehong nagtangag og 6-2 nga baraha.

Ang Beermen anaa sa ikapitong puwesto bitbit ang 3-3 nga marka.