Knicks padayong nanginit

Milansang sa ikasiyam nga sagunson nga daog

CEBU, Philippines — Si Karl-Anthony Towns mipabuto og 31 puntos samtang si Josh Hart mirehistro sa ikaduha niyang sagunson nga triple-double sa dihang gipakaging sa New York Knicks ang Utah Jazz, 119-103, aron inaton ang nagkadena nilang daog ngadto sa siyam ka duwa sa NBA kagahapong adlawa didto sa Madison Square Garden sa New York.

Wala man tuod ang duha ka sinaligan nilang sila si Jalen Brunson ug Miles McBride kay nangayayay apan wala kini nahimong problema sa Knicks tungod sa pagpanginit nilang Towns ug Hart.

Ang mangtas nga big man nga si Towns midugang og 21 ka rebounds samtang si Hart mipupo og 15 puntos, 14 ka rebounds ug 12 ka assists.

Wala sab magpabitin isi Mikal Bridges nga mipatuasik og 27 puntos alang sa miratsadang Knicks.

Sila si Collin Sexton ug Jordan Clarkson mitali og 25 puntos matag usa apan nakawang ang ilang paningkamot gumikan kay ang Jazz nasugamak sa ikalima nilang sunod-sunod nga pilde.

Didto sa Detroit, ang Pistons mipayaka sa Orlando Magic, 105-96, apan nasagolan og kagul-anan ang ilang kadaogan tungod kay seryoso mang naangol ang paa sa pambato nilang guard ngaq si Jaden Ivey.

Si Cade Cunningham maoy nangu sa Pistons uban ang 19 punts, walo ka rebounds ug siyam ka assists. Si Jalen Duren midugang og 18 puntos ug 11 ka rebounds samtang si Harris mitimbre og 17 puntos.

Sa laing bahin, ang Toronto Raptors, nga nadasig sa pagbalik ni Immanuel Quickley, mipakgang sa 11 ka sagunson nilang pilde human gibugha ang Brooklyn Nets, 130-113.

Si Scottie Barns miharos og 33 puntos ug 13 ka rebounds samtang si Quickley, nga nakapalta og 22 ka duwa tungod kay nayayay ang iyang siko, mibubo og 21 puntos ug 15 ka assists aron tabangan ang Raptors nga makabangon gikan sa makapadisya nga 54 puntos nga kapildihan sa mga kamot sa Celtics didto sa Boston niadtong bisperas sa bag-ong tuig.        Sa Washington, si Jordan Poole mikadlit og 30 puntos aron pangulohan ang Wizards ngadto sa 125-107 nga pagtumba sa Chicago Bulls.

Si Justin Champagnie miamot og 15 puntos alang sa Wizards nga miposte sa ikaunom pa lamang nilang daog ning season.

Ang Miami Heat, nga nakapasol og 32 puntos gikan ni Tyler Herro ug 23 puntos, siyam ka rebounds ug 10 ka assists gikan ni Bam Adebayo, mipaluhod sa New Orleans Pelicans, 119-108.

Mikuha sab og atensiyon si Nikola Jokic nga mipupo sa ika-11 niyang triple-double ning season aron ituboy ang Denver Nuggets ngadto sa 139-120 nga paglampornas sa Atlanta Hawks.

Si Jokic mitapos uban ang 23 puntos, 17 ka rebounds ug 15 ka assists.