Tulo ka players gipangsuspenso sa NBA

CEBU, Philippines — Ang NBA misuspenso og tulo ka players tungod sa ilang papel sa nahitabong kagubot atol sa duwa tali sa Dallas Mavericks ug Phoenix Suns niadtong Sabado didto sa Footprint Center sa Phoenix, Arizona.

Si Dallas forward Naji Marshall gipahamtangan og upat ka duwa nga suspensiyon samtang ang sentro sa Suns nga si Jusuf Nurkic gi-ban sa liga og tulo ka duwa.

Nasilotan sab si Mavericks forward P.J Washington nga molingkod og usa ka duwa.

Ang insidente miulbo sa nahibilin nga 9:02 sa ikatulong kuwarter sa dihang si Nurkic natawgan og offensive foul batok ni Daniel Gifford sa Dallas.

Human niini, nagkabangi dayon sila si Marshall ug Nurkic, nga mipabokal sa tensiyon pinaagi sa paglabyog sa iyang kamot ug paghapak sa ulo ni Marshall.

Mitingkag ang dunggan sa gibuhat kaniya, si Marshall mibawos pinaagi sa paglabay og kumo ngadto sa nawong ni Nurkic.

"As the officials and other players attempted to diffuse the situation, Washington further escalated the altercation by shoving Nurkic to the floor. For their roles, Marshall, Nurkic and Washington were assessed technical fouls and ejected from the game," matud pa sa NBA sa usa ka opisyal nga pamahayag.

Wala makuntento bisan og mihupay na ang sitwasyon, si Marshall mikomprontase pa ni Nurkic duol sa locker rooms sa mainit nga paagi hinungdan sa mas bug-at niining silot.

Ang NBA nagkanayon nga ang gidisiplinang mga players dili bayran samtang magsilbe sa ilang suspensiyon.