Silotan ang tanang kawatan
Sakto ang paniid nga:
• Wala ra sa kumingking ang gipasangil batok ni Bise Presidente Sara Duterte nga pagbolsa sa ?612.5 milyones sa iyang confidential funds sa Office of the Vice President (OVP) ug Department of Education (DepEd) sa mga tuig 2022 ug 2023; kon ikumparar sa
• Pagpaburot sa binilyon ka pesos nga Ayuda sa Kapos ang Kita Program (AKAP) ug pork barrel projects nga gipasangil batok sa administrasyon ni Presidente Ferdinand Marcos Jr. pinaagi sa pagmaniobra nilang House Speaker Martin Romualdez ug Senate President Chiz Escudero sa 2025 budget.
* * *
Pero sayop ang pangangkon nga:
• Walay katungod silang Romualdez ug mga kongresista sa pag-impeach ni Duterte sa House of Representatives ug silang Escudero ug mga senador sa pagkonbikto ni Duterte sa impeachment trial tungod sa mas dagkong anomaliya nga gipasangil batok nila; kay
• Samtang kondenahon ang administrasyon sa paglaslas sa budget sa Edukasyon, Kahimsog, Agrikultura, ug Pantawid Pamilyang Pilipino Program (4Ps), dili angay nga palutson si Duterte kon tinuod nga nag-imbento nilang Mary Grace Piattos ug laing 1,322 ka mga ngalan pagtabon sa kawat sa iyang confidential funds.
* * *
May sukaranan ang awhag nga angayng suportahan ang mga imbestigasyon sa Kongreso, bisan kadudahan ang katuyoan, nga nakahipos og mga ebidensiya sa bangis nga mga krimen nga gipasangil batok sa mga Duterte.
Kay ang buwag nga mga imbestigasyon sa House Quad Committee ug sa House Committee on Good Government maoy nakabisto giunsa pagpatuman ang lapad nga binayranay sa laktod nga pinatyanay sa drug war sa kanhi administrasyon ug giunsa pagwaldas ang kuwarta sa OVP ug DepEd.
* * *
Pero dili angayng piyongan lang ang mga binuang nga gipasangil batok sa administrasyong Marcos kay mahimong mas mameligro ang nasud kon makabalik ang mga Duterte sa Malacañang. Angayng batokan ang tanang kahiwian bisan kinsa pay nagpasiugda, mga Marcos man o mga Duterte, kay kitang katawhan ang makaluluoy nga mga biktima.
Maong hangpon nato kon ikiha na sa Department of Justice o ipadakop na sa International Criminal Court ang mga Duterte. Pero padayong barawon ang administrasyon sa pagsurikbot sa kuwarta sa Philippine Health Insurance Corp., pagpangilad sa Maharlika Investment Fund ug pagpaugat sa pork barrel.
- Latest
